មន្ត្រីព្រំដែនប្រទេសប៉ាណាម៉ា បាននិយាយកាលពីថ្ងៃព្រហស្បតិ៍ថា ការឆ្លងកាត់របស់ជនអន្តោប្រវេសន៍តាមព្រៃ Darien Gap ដ៏គ្រោះថ្នាក់ដែលភ្ជាប់ប្រទេសប៉ាណាម៉ា ទៅកាន់ប្រទេសកូឡុំប៊ី បានធ្លាក់ចុះជាងមួយភាគបី ក្នុងរយៈពេល៩ខែដំបូងនៅឆ្នាំនេះ។

លោក Alexis de Gracia ប្រធានកងពលភាគខាងកើតនៃអង្គភាពសេវាព្រំដែនជាតិ បាននិយាយដោយដកស្រង់ទិន្នន័យផ្លូវការថា នៅចន្លោះខែមករាដល់ថ្ងៃទី២៥ ខែកញ្ញា ជនអន្តោប្រវេសន៍ ២៥៩.៧១២នាក់ បានទៅដល់ប្រទេសប៉ាណាម៉ា តាមព្រៃ Darien ដែលបានថយចុះ៣៥% បើធៀបនឹងរយៈពេលដូចគ្នាក្នុងឆ្នាំ២០២៣។

អាជ្ញាធរប្រទេសប៉ាណាម៉ា សន្មត់ការធ្លាក់ចុះនេះដោយសារវិធានការសន្តិសុខកាន់តែតឹងរ៉ឹង ដែលបានអនុវត្តដោយរដ្ឋាភិបាលរបស់ប្រធានាធិបតី លោកចូសេ រ៉ាអ៊ូល មូលីណូ(Jose Raul Mulino) ចាប់តាំងពីលោកបានឡើងកាន់តំណែងនៅថ្ងៃទី១ ខែកក្កដា។

កិច្ចខិតខំប្រឹងប្រែងរបស់រដ្ឋាភិបាលថ្មី រួមមានការបិទផ្លូវមួយចំនួនឆ្លងកាត់ព្រៃ និងបង្កើនការនិរទេសដោយមានការគាំទ្រពីសហរដ្ឋអាមេរិក។

ទិន្នន័យនេះ ក៏កើតមានឡើងជិតបួនខែ បន្ទាប់ពីប្រធានាធិបតីសហរដ្ឋអាមេរិក លោក Joe Biden បានបង្កើតបម្រាមសិទ្ធិជ្រកកោនលើជនអន្តោប្រវេសន៍ដែលត្រូវបានចាប់ខ្លួនដោយខុសច្បាប់ឆ្លងកាត់ព្រំដែនអាមេរិក-ម៉ិកស៊ិក។

ប្រទេសប៉ាណាម៉ា បានក្លាយជាច្រកឆ្លងកាត់សម្រាប់ជនអន្តោប្រវេសន៍រាប់ម៉ឺននាក់ ដែលពួកគេភាគច្រើន ព្យាយាមដើម្បីបានទៅដល់សហរដ្ឋអាមេរិក។ កាលពីឆ្នាំមុន ជនអន្តោប្រវេសន៍ចំនួន ៥២០.០០០នាក់ ភាគច្រើនជាជនជាតិវេណេស៊ុយអេឡា បានឆ្លងកាត់ព្រៃ Darien ដើម្បីស្វែងរកឱកាសកាន់តែប្រសើរនៅភាគខាងជើង។