សហភាពអឺរ៉ុប (EU) កាលពីថ្ងៃព្រហស្បតិ៍ បានជំរុញប្រទេសលីបង់ និងអ៊ីស្រាអែល បញ្ចប់ការគំរាមកំហែងឆ្លងព្រំដែនទាំងអស់ និងអនុវត្តបទឈប់បាញ់ឆ្លងកាត់ខ្សែបន្ទាត់ពណ៌ខៀវ(Blue Line) ដែលជាតំបន់ទ្រនាប់ នៅភាគខាងត្បូងប្រទេសលីបង់។

គណៈប្រតិភូ EU ប្រចាំប្រទេសលីបង់ បាននិយាយនៅក្នុងសេចក្តីថ្លែងការណ៍មួយថា៖« យើងជំរុញឲ្យ ភាគីទាំងពីរ អនុវត្តជាបន្ទាន់នូវបទឈប់បាញ់ នៅទូទាំងខ្សែបន្ទាត់ពណ៌ខៀវដែលមានប្រសិទ្ធភាព និងបញ្ចប់ការគំរាមកំហែងឆ្លងព្រំដែនភ្លាមៗ ហើយធ្វើការឆ្ពោះទៅរកការអនុវត្តពេញលេញ និងដោយស្មើភាពគ្នានូវសេចក្តីសម្រេចលេខ ១៧០១ របស់ក្រុមប្រឹក្សាសន្តិសុខអង្គការសហប្រជាជាតិ ដើម្បីធានាការវិល ត្រឡប់ប្រកបដោយសុវត្ថិភាពនៃប្រជាជនភៀសខ្លួនទាំងសងខាង ជាផ្នែកនៃដំណោះស្រាយដ៏ទូលំទូលាយដែលសម្រេចបាន»។

សេចក្តីថ្លែងការណ៍ បានកត់សម្គាល់ថា៖«ការកើនឡើងភាពតានតឹងណាមួយបន្ថែមទៀត នឹងមានផលវិបាកយ៉ាងធ្ងន់ធ្ងរសម្រាប់តំបន់ និងលើសពីនេះ» ដោយអំពាវនាវដល់សហគមន៍អន្តរជាតិ ឲ្យប្រមូលផ្តុំក្នុងការគាំទ្រដល់កិច្ចខិតខំប្រឹងប្រែងការទូតដែលកំពុងបន្ត។

សហភាពអឺរ៉ុប ក៏បានបញ្ជាក់ឡើងវិញនូវការគាំទ្ររបស់ខ្លួនចំពោះប្រទេសលីបង់ ដោយនិយាយថា៖ «ប្រជាជនលីបង់ អាចធានាបានថា រដ្ឋជាសមាជិក និងសហភាពអឺរ៉ុប នឹងបន្តគាំទ្រពួកគេ»។