ក្រុមប្រឹក្សាសុវត្ថិភាពដឹកជញ្ជូនជាតិរបស់សហរដ្ឋអាមេរិក (NTSB) កាលពីថ្ងៃព្រហស្បតិ៍ បានចេញ «ការណែនាំសុវត្ថិភាពបន្ទាន់» ទាក់ទងនឹងប្រព័ន្ធចង្កូតយន្តហោះ Boeing 737 ដោយបង្ហាញពីហានិភ័យនៃការជាប់គាំង។

ការណែនាំនេះបានធ្វើឡើងបន្ទាប់ពីឧប្បត្តិហេតុ កាលពីថ្ងៃទី៦ ខែកុម្ភៈ ពាក់ព័ន្ធនឹងយន្តហោះ Boeing 737 MAX 8 ដំណើរការដោយក្រុមហ៊ុនអាកាសចរណ៍ United Airlines ដែលឈ្នាន់ចង្កូតរបស់វាបាន «ជាប់គាំង» នៅក្នុងស្ថានភាពធម្មតាខណៈកំពុងស្ថិតនៅលើផ្លូវរត់ បន្ទាប់ពីបានចុះចតនៅអាកាសយានដ្ឋាន Newark ក្នុងរដ្ឋ New Jersey ។

ក្រុមប្រឹក្សាសុវត្ថិភាពដឹកជញ្ជូន បាននិយាយថា គ្មាននរណាម្នាក់ក្នុងចំណោមអ្នកដំណើរ១៥៥នាក់និងសមាជិកយានិក៦នាក់ បានរងរបួសនោះទេ ដោយប្រធានក្រុមយានិកបានប្រើប្រាស់ការគ្រប់គ្រងបន្ថយល្បឿននៅខាងមុខ ដើម្បីកាច់ចង្កូតយន្តហោះ។

ក្រុមហ៊ុន Boeing បានស្ថិតនៅក្រោមសម្ពាធកាន់តែខ្លាំងឡើង បន្ទាប់ពីឧប្បត្តិហេតុសុវត្ថិភាពមួយចំនួនពាក់ព័ន្ធនឹងយន្តហោះរបស់ខ្លួន។

អាជ្ញាធរអាកាសចរណ៍សហព័ន្ធនិយាយថា ខ្លួនកោះប្រជុំក្រុមប្រឹក្សាត្រួតពិនិត្យសកម្មភាពកែសម្រួល នៅថ្ងៃសុក្រនេះ ដោយផ្អែកលើការណែនាំរបស់ក្រុមប្រឹក្សាសុវត្ថិភាពដឹកជញ្ជូនជាតិរបស់សហរដ្ឋអាមេរិក (NTSB) ដើម្បីកំណត់ពីចំណាត់ការបន្ទាប់។