ផ្ទះបាយស៊ុប Nation Station ដែលជាអង្គការមិនរកបា្រក់ចំណេញនៅទីក្រុង Beirut និងត្រូវបានបង្កើតឡើង បន្ទាប់ពីហេតុការណ៍ផ្ទុះនៅកំពង់ផែក្រុង Beirut កាលពីឆ្នាំ ២០២០ បច្ចុប្បន្នកំពុងជួយពលរដ្ឋជម្លៀសខ្លួនពីការវាយប្រហារតាមច្រកអាកាសរបស់អ៊ីស្រាអែល ។

អង្គការស្ម័គ្រចិត្តមួយនេះដែលស្ថិតនៅសង្កាត់ Geitawi បានបង្កើនចំនួនអាហាររបស់ពួកគេជាការឆ្លើយតបគ្រាអាសន្ន ចាប់តាំងពីថ្ងៃអង្គារមក ដោយចែកចាយអាហារទាំងអស់នេះដល់សាលារៀនដែលត្រូវបានប្រើប្រាស់ជាទីជម្រកសម្រាប់ជនភៀសខ្លួន ។ 

អ្នកស្រី Josephine Abu Abdo គឺជាសហស្ថាបនិកបង្កើតអង្គការ Nation Station និយាយថា ដំបូងពួកយើងមានគ្នា ៥នាក់ ក្រោយមកពួកយើងមានគ្នា ១០០នាក់ ហើយនិងធ្វើឲ្យស្ថានីយ៍មួយនេះ ដែលធ្លាប់ត្រូវបានបោះបង់ចោល ក្លាយជាតំបន់សហគមន៍សម្រាប់ពិភពលោក ។

អង្គការមួយនេះ រៀបចំអាហារចំនួន ៧០០ ក្នុង ១ថ្ងៃ ហើយសង្ឃឹមថា នឹងបង្កើនចំនួនអាហារពេលដែលជំនួយកាន់តែច្រើនត្រូវបានផ្តល់ជូន ។

អ្នកស្រី Abu Abdo បន្តថា ពួកយើងបន់ឲ្យតែពួកយើងមិនត្រូវធ្វើរឿងនេះទេ តែនេះគឺជាកាតព្វកិច្ចជាមូលដ្ឋានដែលពួកយើងត្រូវតែធ្វើសម្រាប់បងប្អូនប្រុស-ស្រីរបស់ពួកយើង គឺពលរដ្ឋដែលបានជម្លៀសខ្លួន ។

គួរឲ្យដឹងថា មនុស្សរាប់ម៉ឺននាក់នៅភាគីជម្លោះតាមព្រំដែនទាំង ២ បានរត់ភៀសខ្លួនចេញពីផ្ទះសម្បែងរបស់ពួកគេ ធ្វើឲ្យតំបន់ជាច្រើនត្រូវបោះបង់ចោល ហើយអ៊ីស្រាអែល បានប្រកាសថានឹងបញ្ជូន អ្នកជម្លៀសខ្លួនឲ្យវិលត្រឡប់មកកាន់ផ្ទះសម្បែងរបស់ពួកគេវិញ ពេលណាដែលសម្រេចគោលដៅសង្រ្គាមរបស់ពួកគេ ។

ការវាយប្រហារតាមច្រកអាកាសរបស់អ៊ីស្រាអែល ក្នុងសប្តាហ៍កន្លងមកនេះ ចំគោលដៅរាប់រយកន្លែងនៅតំបន់ភាគខាងត្បូងលីបង់ និងវាយប្រហារចូលកាន់តែជ្រៅទៅក្នុងប្រទេសមួយនេះ ដោយបានសម្លាប់មនុស្សជាង ៦០០នាក់ ៕