ខេត្តចំនួន ១១ នៅតាមបណ្ដោយអាងទន្លេ Chao Phraya (ចៅផ្រៈយ៉ា) ក្នុងនោះរួមទាំងទីក្រុងធំ គឺបាងកកផងដែរ ត្រូវបានព្រមានឲ្យត្រៀម សម្រាប់ទឹកជំនន់ដែលអាចកើតមាន ខណៈដែលទំនប់ Chao Phraya ក្នុងខេត្ត Chai Nat (ឆៃណាត) នឹងបើកបង្ហូរទឹកក្នុងបរិមាណជាច្រើនបន្ថែមទៀត។

នាយកដ្ឋានធារាសាស្ត្រ កាលពីថ្ងៃព្រហស្បតិ៍ (ទី២៦ ខែកញ្ញា) បានឲ្យដឹងថា ខ្លួននឹងបង្កើនបរិមាណបង្ហូរទឹករបស់ទំនប់នេះជាលំដាប់ ពីកម្រិតបច្ចុប្បន្ន ១.៤៩៨ម៉ែត្រគូប ក្នុង ១វិនាទី ដោយសារភ្លៀងបន្តធ្លាក់ខ្លាំង និងការហូរពីភាគខាងជើង។

នាយកដ្ឋានបានប្រាប់ថា ការកែសម្រួល នឹងត្រូវបានធ្វើឡើងជាជំហានៗ ប៉ុន្តែនឹងត្រូវកំណត់ត្រឹម ២.០០០ម៉ែត្រគូប ក្នុង ១វិនាទី។ ការបង្ហូរនេះនឹងធ្វើកម្ពស់ទឹកឡើងខ្ពស់ ចន្លោះពី ១ម៉ែត្រ ទៅ ១,៥ម៉ែត្រ នៅព្រែក Phong Pheng (ផងផេង) ក្នុងខេត្ត Ang Thong (អាងថង) និងព្រែក Bang Ban (បាងបាន) និងទន្លេ Noi (ណយ) ក្នុងខេត្តអយុធ្យា។

កម្រិតទឹកឡើងខ្ពស់ ក៏អាចនាំឲ្យព្រែក និងទន្លេដែលបែកចេញពីផ្លូវទឹកទាំងនេះហូរហៀរផងដែរ។ នាយកដ្ឋានបានរាយការណ៍ថា គិតត្រឹមម៉ោង ៧ព្រឹកថ្ងៃទី ២៦ ខែកញ្ញា កម្រិតទឹកនៅស្ថានីយ៍ C2 ក្នុងស្រុក Muang (មឿង) ខេត្ត Nakhon Sawan (ណាខន សុវណ្ណ) បានឡើង ២១សង់ទីម៉ែត្រ ចាប់តាំងពីថ្ងៃទី២៥ ខែកញ្ញា ប៉ុន្តែនៅតែទាបជាងមាត់ច្រាំង ៣,២៩ម៉ែត្រ។ ល្បឿនលំហូរ នៅស្ថានីយ៍នេះ គឺ ១.៨៤៦ម៉ែត្រគូប ក្នុង ១វិនាទី។

នៅស្ថានីយ៍ C3 ឬទំនប់ Chao Phraya ក្នុងខេត្ត Chai Nat កម្រិតទឹកបានឡើងខ្ពស់បន្តិច ចាប់តាំងពីថ្ងៃទី២៥ ខែកញ្ញាមក ប៉ុន្តែនៅតែទាបជាងច្រាំងទន្លេ ៣,៥២ម៉ែត្រ។ ល្បឿនលំហូរ នៅស្ថានីយ៍នេះ គឺ ១,៤៩៨ម៉ែត្រគូប ក្នុង ១វិនាទី។

ជាមួយគ្នានេះ ទូរទស្សន៍ Nation TV បានរាយការណ៍កាលពីថ្ងៃទី២៦ ខែកញ្ញាថា ទឹកជំនន់ដែលបង្កឡើងដោយការហូរហៀរនៃទឹកទន្លេ Ping ក្នុងស្រុកមឿង ខេត្តឈៀងម៉ៃ មានសភាពកាន់តែអាក្រក់ឡើងៗជាងកាលពីឆ្នាំ២០១១៕