រដ្ឋមន្ត្រីការបរទេសថ្មីរបស់បារាំង បាននិយាយថា ប្រទេសរបស់លោកគាំទ្រផែនការរបស់សហភាពអឺរ៉ុប (EU) ក្នុងការដំឡើងពន្ធលើរថយន្តអគ្គិសនីផលិតនៅប្រទេសចិន ដោយពាក់ព័ន្ធនឹងការឧបត្ថម្ភធនដែលរដ្ឋាភិបាលក្រុងប៉េកាំង បានប្រើប្រាស់ដើម្បីបន្តក្ដោបក្ដាប់ នៅក្នុងវិស័យនេះ។

នៅក្នុងបទសម្ភាសន៍មួយជាមួយពិធីការិនី Annmarie Hordern របស់ទូរទស្សន៍ Bloomberg លោក Jean-Noel Barrot (ហ្សង់-ណូអែល បារ៉ុត) បានប្រាប់ថា៖ «គោលបំណងរបស់ EU ក្នុងការដំឡើងពន្ធទាំងនោះ គឺមិនមែនដើម្បីពាក់ព័ន្ធនឹងទម្រង់នៃគោលនយោបាយគាំពារនិយមទូទៅ ដោយការមិនគោរពប្រទេសចិននោះទេ។ វាគឺជាមូលដ្ឋាន ដើម្បីបង្កើតទីលានប្រកួតប្រជែងស្មើភាពគ្នា»។

លោកបានបន្តថា ការអនុវត្តវិធានការពាណិជ្ជកម្ម នឹងអនុញ្ញាតឲ្យអឺរ៉ុបនៅតែមានភាពឯករាជ្យ ទាំងខាងសេដ្ឋកិច្ច និងយុទ្ធសាស្ត្រស្វ័យភាពកាន់តែខ្លាំងឡើង។

គួរបញ្ជាក់ថា កិច្ចចរចាកំពុងប្រព្រឹត្តទៅ រវាងចិន និងសហភាពអឺរ៉ុប ខណៈដែលភាគីទាំង២ ស្វែងរកមធ្យោបាយ ដើម្បីបញ្ចៀសការដំឡើងពន្ធគយដែលកំពុងលេចចេញជារូបរាងឡើង។ ហានិភ័យសម្រាប់អឺរ៉ុប គឺការងាររាប់ម៉ឺននាក់ ហើយនិងទិន្នផលសេដ្ឋកិច្ចពីឧស្សាហកម្មរថយន្ត និងអ្នកផ្គត់ផ្គង់ដែលកំពុងប្រឈមនឹងផលប៉ះពាល់ខ្លាំងពីការបញ្ចូលអគ្គិសនី៕