សារព័ត៌មាន Politico កាលពីថ្ងៃព្រហស្បតិ៍ (ទី២៦ ខែកញ្ញា) បានរាយការណ៍ថា ជនជាតិអ៊ីរ៉ង់ជាច្រើននាក់ត្រូវបានចោទប្រកាន់ដោយគណៈវិនិច្ឆ័យធំរបស់សហរដ្ឋអាមេរិក ពីបទចោទលួចចូលបច្ចេកវិទ្យាព័ត៌មានវិទ្យារបស់ក្រុមធ្វើយុទ្ធនាការបោះឆ្នោតប្រធានាធិបតី ឆ្នាំ២០២៤ ឲ្យលោក Donald Trump របស់គណបក្សសាធារណរដ្ឋ។

សារព័ត៌មាន Politico បានឲ្យដឹងថា ឈ្មោះជនជាប់ចោទ និងបទចោទប្រកាន់ព្រហ្មទណ្ឌជាក់លាក់ មិនទាន់មាននៅឡើយទេ ភ្លាមៗនេះ។ ដោយគ្មានការលើកឡើងសំដៅដល់ប្រភពនានា សារព័ត៌មាននេះបានរាយការណ៍ថា គណៈវិនិឆ្ឆ័យធំ បានអនុម័តការចោទប្រកាន់ជាសម្ងាត់ កាលពីរសៀលថ្ងៃទី២៦ ខែកញ្ញា ហើយក្រសួងយុត្តិធម៌ត្រូវបានរំពឹងថា នឹងប្រកាសការចោទប្រកាន់នេះ នៅថ្ងៃទី២៧ ខែកញ្ញា។

ក្រសួងយុត្តិធម៌បានបដិសេធមិនធ្វើអត្ថាធិប្បាយអ្វីឡើយ ហើយយុទ្ធនាការរបស់លោក Trump ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយ។

តែយ៉ាងណាក្ដី ក្រុមធ្វើយុទ្ធនាការរបស់លោក Trump បាននិយាយកាលពីខែសីហាថា ទំនាក់ទំនងផ្ទៃក្នុងរបស់ខ្លួនមួយចំនួន ត្រូវបានលួចចូល ហើយពួកគេបានទម្លាក់ការទទួលខុសត្រូវទៅលើរដ្ឋាភិបាលអ៊ីរ៉ង់៕