​ចិន៖ យន្តហោះ និង​គ្រឿង​យុទ្ធោបករណ៍​ការពារ​ដែនអាកាស​ជាច្រើន នឹង​ត្រូវ​បាន​បង្ហាញ​នៅ​ក្នុង​ពិព័រណ៍​អាកាសចរណ៍ និង​អវកាស​អន្តរជាតិ​ចិន​លើក​ទី ១៣ ដែល​ត្រូវបាន​គេ​ស្គាល់​ផង​ដែរ​ថា ​ជា​ពិព័រណ៍​ចិន​ឆ្នាំ​២០២១ នៅ​ទីក្រុង​ជូ​ហៃ​ ភាគ​ខាងត្បូង​ខេត្ត​ក្វាង​ទុង ​ប្រទេស​ចិន​។

​

​ក្នុងនាម​ជា​ក្រុមហ៊ុន​តាំង​ពិព័រណ៍​មួយ​ក្នុងចំណោម​ក្រុមហ៊ុន​ធំៗ​ដ៏ទៃ​ទៀត សាជីវកម្ម​អាកាស​ចរណ៍​ចិន Ltd (AVIC) បង្កើត​អនុ​តំបន់​តាំង​ពិព័រណ៍​សម្រាប់​ការវាយប្រហារ និង​ការពារ​ដែនសមុទ្រ​នៅឯ​ពិព័រណ៍​ចិន​ឆ្នាំ​២០២១។ នៅ​កណ្ដាល​ស្តង់​គឺជា​សេណា​រី​យ៉ូ​ដែល​គេ​រៀបចំ​ដូច​ការពិត​នៃ​បេសកកម្ម​កង​ម៉ា​រី​ន​ដែល​ពាក់ព័ន្ធ នាវា​ផ្ទុក​យន្តហោះ Shandong យន្តហោះ​ល្បាត​ប្រឆាំង​នាវាមុជទឹក Y-8 និង​យន្តហោះ​ចម្បាំង JH-7E​។ ​យាន​បាញ់​មី​ស៊ី​ល​មួយ​គ្រឿង​ក៏​នឹង​បង្ហាញខ្លួន​លើកដំបូង​នៅ​ឯ​ពិធី​តាំង​ពិព័រណ៍​ផង​ដែរ​។ ​លោក Kang Dengjun អ្នកស្រាវជ្រាវ​ម្នា​ក់​នៅ​វិទ្យាស្ថាន​អវកាស​ចិន​ និងសាជីវកម្ម​ឧស្សាហកម្ម​អាកាសចរណ៍​ចិន Ltd (AVIC) បាន​និយាយ​ថា "​នេះ​គឺជា​យាន​បាញ់​មី​ស៊ី​ល​ទូទៅ​ដែល​នឹង​បង្ហាញ​ខ្លួន​ជា​លើកដំបូង​ នៅ​ក្នុង​ការ​តាំង​ពិព័រណ៍​ឆ្នាំនេះ​។ មី​ស៊ី​ល​បាលី​ស្ទិ​ក​ប្រឆាំង​នាវា​ស្ទើរតែ​ទាំងអស់ ​ដែល​ផលិត​ដោយ​សាជីវកម្ម​ឧស្សាហកម្ម​អាកាសចរណ៍​ចិន AVIC អាច​ត្រូវ​បាន​បាញ់​ចេញ​ដោយ​យាន​បាញ់​មី​ស៊ី​ល​នេះ​។​

​ជាមួយ​គ្នា​នេះ​ដែរ មី​ស៊ី​ល​ការពារ​ឆ្នេរសមុទ្រ​ជាច្រើនគ្រាប់នឹង​ត្រូវ​ដាក់​បង្ហាញ​ផងដែរ​។ ក្នុងចំណោម​នោះ​មី​ស៊ី​លម៉ូ​ឌែ​ល CM-802B និង YJ-18E នឹង​ក្លាយជា​ចំណុច​ទាក់ទាញ​ពិសេស​។​ ​យោងតាម​លោក Kang មី​ស៊ី​លម៉ូ​ឌែ​ល CM-802B អាច​ហោះ​ទៅដល់​គោលដៅ​ចម្ងាយ ២៩០​គីឡូម៉ែត្រ ខណៈដែលមី​ស៊ី​លម៉ូ​ឌែ​ល YJ-18E អាច​រក្សា​ល្បឿន​លឿន​ជាង​សំឡេង​នៅ​ផ្នែក​ដំបូង​នៃ​ការហោះហើរ​របស់ខ្លួន ហើយ​ប្តូរ​ទៅជា​ល្បឿន​លឿន​ជាង​មុនបន្ទាប់ពី​ចាប់បាន​គោល​ដៅ​ភ្លាមៗ​មុន​ការវាយប្រហារ​។ ប្រព័ន្ធ​អាវុធ​ការពារ​ដែនអាកាស​ចំនួន​ពីរនឹងត្រូវ​បានដាក់​បង្ហា​ញ​ផងដែរ គឺ​ប្រព័ន្ធ​ការពារ​ដែនអាកាស FK-3 និង​ប្រព័ន្ធ​ការពារ​ដែនអាកាស FK-2000៕

អត្ថបទ៖ សុខមាន