ទីភ្នាក់ងារជនភៀសខ្លួនអង្គការសហប្រជាជាតិ (UN) នៅថ្ងៃសុក្រ (ទី២៧ ខែកញ្ញា) នេះ បាននិយាយថា មនុស្សជាង ៣០.០០០នាក់ ដែលភាគច្រើនជាជនជាតិស៊ីរី បានចាកចេញពីប្រទេសលីបង់ឆ្លងចូលទៅក្នុងប្រទេសស៊ីរី ក្នុងរយៈពេល ៧២ម៉ោងចុងក្រោយនេះ ចំពេលជម្លោះកើនឡើងកាន់តែខ្លាំងទៅៗ រវាងកងកម្លាំងអ៊ីស្រាអែល និងក្រុមហេសបូឡា ដែលបានសម្លាប់មនុស្សរាប់រយនាក់ នៅលីបង់។

តំណាង UNHCR ប្រចាំនៅស៊ីរី លោក Gonzalo Vargas Llosa បាននិយាយថា ប្រហែល ៨០ភាគរយនៃអ្នកឆ្លងកាត់ទាំងនោះ គឺជាជនជាតិស៊ីរី ហើយប្រហែល ២០ភាគារយ ជាជនជាតិលីបង់ ដោយលោកបានបន្ថែមថា ប្រហែលពាក់កណ្តាលជាកុមារ និងក្មេងជំទង់ ហើយបុរសកំពុងឆ្លងកាត់ក្នុងចំនួនតិចជាងស្ត្រី។

លោកបានប្រាប់សន្និសីទសារព័ត៌មានមួយថា៖ «ពួកគេកំពុងឆ្លងពីប្រទេសដែលមានសង្រ្គាមទៅកាន់ប្រទេសមួយដែលបានប្រឈមនឹងវិបត្តិជម្លោះអស់រយៈពេល ១៣ឆ្នាំមកហើយ ដែលនេះជាជម្រើសដ៏លំបាកបំផុតមួយ»។

អ្នកតំណាងរូបនេះបានបន្ថែមថា៖ «យើងនឹងត្រូវរង់ចាំមើលក្នុងរយៈពេលប៉ុន្មានថ្ងៃខាងមុខនេះថា តើមានមនុស្សចំនួនប៉ុន្មានបន្ថែមទៀតដែលធ្វើបែបនេះ»៕