ក្រុងប៉េកាំងបានប្រាប់ឲ្យដឹងថា ប្រទេសចិន និងឥណ្ឌា បានឈានដល់ការឯកភាពគ្នាកាន់តែច្រើនឡើង ពាក់ព័ន្ធនឹងការដកកងទ័ពចេញពីផ្នែកខ្លះនៅតាមព្រំដែនមានជម្លោះ រវាងប្រទេសទាំង២ ដោយនេះជាសញ្ញាបន្ថែមទៀតថា ភាពតានតឹង រវាងប្រទេសជិតខាងប្រដាប់ដោយអាវុធនុយក្លេអ៊ែរ កំពុងធូរស្រាល។

ដោយឆ្លើយតបទៅនឹងសំណួរ នៅឯសន្និសីទសារព័ត៌មាន កាលពីថ្ងៃព្រហស្បតិ៍ (ទី២៦ ខែកញ្ញា) អំពីការដកទ័ពនៅព្រំដែន អ្នកនាំពាក្យក្រសួងការពារជាតិចិន បានប្រាប់ថា ភាគីទាំង២ មាន «ការយល់ឃើញខុសគ្នាកាន់តែតិចទៅៗ និងការយល់ឃើញស្របគ្នាកាន់តែធំទូលំទូលាយជាងមុន»។

បើយោងតាមប្រតិចារិកនៃសន្និសីទសារព័ត៌មាន បានបង្ហាញថា អ្នកនាំពាក្យ លោក Zhang Xiaogang បាននិយាយថា មន្ត្រីចិន និងឥណ្ឌា បានបន្តការសន្ទនាយ៉ាងជិតស្និទ្ធ និងផ្លាស់ប្តូរយោបល់គ្នាទៅវិញទៅមក ស្ដីពីបញ្ហាព្រំដែន តាមរយៈបណ្តាញការទូត និងយោធា។

លោក Zhang បានបន្ថែមថា៖ «ភាគីទាំង២ បានយល់ព្រមពង្រឹងកិច្ចសន្ទនា និងការពិគ្រោះយោបល់ សម្របសម្រួលរាល់កង្វល់ស្របច្បាប់របស់គ្នាទៅវិញទៅមក និងឈានដល់ដំណោះស្រាយដែលអាចទទួលយកបានទៅវិញទៅមក នៅដំណាក់កាលដំបូង»។

គួរបញ្ជាក់ថា ទំនាក់ទំនងរវាងប្រទេសទាំង២ បានជាប់គាំងចាប់តាំងពីខែមិថុនា ឆ្នាំ២០២០ មក នៅពេលដែលការប៉ះទង្គិចគ្នា រវាងទាហាននៅតាមព្រំដែនហិម៉ាល័យដែលមានជម្លោះ បានធ្វើឲ្យជនជាតិឥណ្ឌាយ៉ាងហោចណាស់ ២០នាក់ និងជនជាតិចិនមិនដឹងពីចំនួន បាត់បង់ជីវិត។

ចាប់តាំងពីពេលនោះមក គេឃើញថា មានការរីកចម្រើនជាលំដាប់ ក្នុងការដោះស្រាយវិបត្តិព្រំដែន នៅក្នុងកិច្ចចរចាការទូត និងយោធាជាង ៥០លើក៕