ត្រីរសជាតិឆ្ងាញ់សាច់ស Hilsa ប្រហែល ៤៥តោន ទៅ ៥០តោន បានដឹកទៅដល់ទីក្រុង Kolkata នៅថ្ងៃសុក្រនេះ ក្រោយពេលរដ្ឋាភិបាលបង់ក្លាដែស ចាប់ផ្តើមឡើងវិញការនាំចេញរបស់ខ្លួនទៅកាន់ប្រទេសឥណ្ឌា មុនរដូវកាលបុណ្យទាននៅខែតុលាខាងមុខនេះ ។

យោងតាមសេចក្តីរាយការណ៍ព័ត៌មាន បានឲ្យដឹងថា អ្នកស្រុករាប់រយនាក់ បានសម្រុកទៅកាន់ផ្សារត្រីបោះដុំ នៅក្នុងទីក្រុង ក្រោយទីក្រុងដាកា ចេញបញ្ជាឲ្យនាំចេញត្រី Hilsa ទម្ងន់ ២.៤២០តោន ទៅកាន់ប្រទេសឥណ្ឌា ។

មាននូវតម្រូវការត្រីយ៉ាងច្រើនលើសលប់ អំឡុងការប្រារព្ធពិធីបុណ្យ 'Durga Puja' គឺជាពិធីបុណ្យហិណ្ឌូដែលមានប្រជាប្រិយភាពជាពិសេសនៅទីក្រុង Kolkata ។

លោក Syed Anwar Maqsood គឺជាប្រធានសមាគមផ្សារត្រីលក់ដុំនៅទីក្រុង Howrahប្រទេសឥណ្ឌា និយាយថា ពួកគេបានយកឈ្នះឧបសគ្គយ៉ាងធំ និងបានសរសេរលិខិតទៅកាន់ប្រទេសបង់ក្លាដែស ដើម្បីអនុញ្ញាតឲ្យមានពាណិជ្ជកម្មត្រី Hilsa រវាងប្រទេសទាំង ២ ។

នៅដើមខែនេះ រដ្ឋាភិបាលបណ្តោះអាសន្នរបស់ទីក្រុងដាកា ដឹកនាំដោយម្ចាស់ជ័យលាភីណូបែលសន្តិភាពលោក Muhammad Yunus បានហាមឃាត់ការនាំចេញត្រី Hilsa ទៅកាន់ប្រទេសឥណ្ឌា ស្របពេលមានភាពចលាចលនយោបានៅក្នុងប្រទេសបង់ក្លាដែស ។

ទោះបីជាយ៉ាងណាក៏ដោយ បទបញ្ជា ត្រូវបានដកចេញវិញ សម្រាប់រដូវកាលបុណ្យទាននាពេលខាងមុខនេះ ដោយមានការស្នើសុំពីក្រុមពាណិជ្ជករត្រីឥណ្ឌា ដើម្បីឈានដល់តម្រូវការក្នុងស្រុក ។

សូមបញ្ជាក់ថា ពាណិជ្ជកម្មត្រី Hilsa រវាងឥណ្ឌា និងបង់ក្លាដែស គឺជានិមិត្តរូបនៃមិត្តភាព ហើយនិងទំនាក់ទំនងការទូតរវាងប្រទេសទាំង ២ ៕