ក្រុមឧទ្ទាមហ៊ួទីដែលមានសម្ព័ន្ធមិត្តជាមួយអ៊ីរ៉ង់ នៅប្រទេសយេម៉ែន នាថ្ងៃសុក្រ (ទី២៧ ខែកញ្ញា) នេះ បាននិយាយថា ពួកគេបានវាយប្រហារទៅលើទីក្រុង Tel Aviv និង Ashkelon របស់អ៊ីស្រាអែល ដោយមីស៊ីលបាលីស្ទិក និងយានដ្រូន ដើម្បីបង្ហាញការគាំទ្រដល់តំបន់ហ្កាហ្សា និងប្រទេសលីបង់។

ជាមួយគ្នានេះ កងទ័ពអ៊ីស្រាអែលបានប្រាប់ថា ខ្លួនបានស្ទាក់ចាប់មីស៊ីលដែលត្រូវបានបាញ់ចេញពីយេម៉ែន បន្ទាប់ពីសំឡេងស៊ីរ៉ែន និងការផ្ទុះ ត្រូវបានឮ នៅពេលព្រឹកថ្ងៃនេះ។

អ្នកនាំពាក្យយោធារបស់ក្រុមហ៊ួទី បានឲ្យដឹងថា ប្រតិបត្តិការរបស់ពួកគេ នឹងមិនបញ្ឈប់ប៉ុន្មានថ្ងៃខាងមុខនេះទេ ពោលគឺត្រូវធ្វើរហូតដល់ការវាយលុករបស់អ៊ីស្រាអែល នៅតំបន់ហ្កាហ្សា និងលីបង់ លែងមានតទៅទៀត។ លោក Yahya Sarea បាននិយាយក្នុងសុន្ទរកថាតាមទូរទស្សន៍ថា៖ «យើងនឹងធ្វើប្រតិបត្តិការយោធាបន្ថែមទៀត ប្រឆាំងនឹងសត្រូវ គឺអ៊ីស្រាអែល ដើម្បីដណ្ដើមជ័យជម្នះឲ្យបងប្អូនរបស់យើង នៅប៉ាឡេស្ទីន និងលីបង់»។

គួរបញ្ជាក់ថា ការវាយប្រហាររបស់អ៊ីស្រាអែល បានសម្លាប់មនុស្សជាង ៦០០នាក់ នៅលីបង់ ចាប់តាំងពីថ្ងៃចន្ទមក ដោយជម្លោះរវាងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់ ស្ថិតក្នុងសភាពតានតឹងខ្លាំងបំផុតលើកដំបូង ក្នុងរយៈពេលជាង ១៨ឆ្នាំ។ ចំណែកក្រុមហេសបូឡា បាន និងកំពុងបាញ់គ្រាប់រ៉ូកែតចូលទៅដែនដីអ៊ីស្រាអែលអស់រយៈពេលជិត ១ឆ្នាំមកហើយ ដើម្បីគាំទ្រសម្ព័ន្ធមិត្តរបស់ខ្លួន គឺក្រុមហាម៉ាសដែលកំពុងតែប្រយុទ្ធជាមួយអ៊ីស្រាអែល នៅតំបន់ហ្កាហ្សា៕