យោធាប្រទេសអ៊ីស្រាអែល បានប្រាប់អ្នកស្រុកនៅតំបន់ជាយក្រុងភាគខាងត្បូងទីក្រុងបេរូត ឱ្យជម្លៀសខ្លួនចេញ កាលពីល្ងាចថ្ងៃសុក្រ បន្ទាប់ពីការវាយប្រហារជាច្រើនដែលខ្លួនបាននិយាយថាបានដាក់គោលដៅលើទីបញ្ជាការកណ្តាលរបស់ក្រុមហេបូឡា។

បទបញ្ជាឱ្យជម្លៀស ដែលធ្វើឡើងដោយអ្នកនាំពាក្យកងទ័ពអ៊ីស្រាអែល លោក Avichay Adraee នៅលើបណ្តាញ X បានប្រាប់អ្នកស្រុកឱ្យចេញឆ្ងាយយ៉ាងហោចណាស់ ៥០០ ម៉ែត្រពីអគារជាក់លាក់ចំនួនបីកន្លែងនៅក្នុងតំបន់។ វាគឺជាការប្រកាសលើកដំបូងនៅក្នុងសង្កាត់ដែលមានប្រជាជនរស់នៅច្រើន នៅភាគខាងត្បូងទីក្រុងបេរូត ។

ការិយាល័យប្រព័ន្ធផ្សព្វផ្សាយរបស់ក្រុមហេសបូឡា បាននិយាយថា ពុំមានការពិតចំពោះសេចក្តីថ្លែងការណ៍ណាមួយជុំវិញការវាយប្រហាររបស់អ៊ីស្រាអែល ប៉ុន្តែពុំបាននិយាយអ្វីអំពីជោគវាសនារបស់មេដឹកនាំក្រុមលោក Sayyed Hassan Nasrallah នោះទេ។

នៅទីក្រុងញូវយ៉ក មន្ត្រីជាន់ខ្ពស់អ៊ីស្រាអែលបានប្រាប់អ្នកសារព័ត៌មានថា មេបញ្ជាការជាន់ខ្ពស់ក្រុមហេសបូឡា គឺជាគោលដៅនៃការវាយប្រហាររបស់អ៊ីស្រាអែលទៅលើទីស្នាក់ការកណ្តាល កាលពីថ្ងៃសុក្រ។

ឯកអគ្គរដ្ឋទូតអង្គការសហប្រជាជាតិរបស់អ៊ីស្រាអែល លោក Danny Danon បានប្រាប់អ្នកសារព័ត៌មាននៅអង្គការសហប្រជាជាតិថា ការវាយប្រហារនេះសំដៅលើ «ការជួបជុំមនុស្សអាក្រក់» រៀបចំផែនការវាយប្រហារបន្ថែមទៀតទៅលើអ៊ីស្រាអែល។

នៅពេលលោកនិយាយថា នេះគឺជាការជួបប្រជុំរបស់មនុស្សអាក្រក់ ដែលលោក Nasrallah គឺជាតួអង្គអាក្រក់ម្នាក់ លោកគឺជាភេរវករ លោកមានឈាមប្រឡាក់លើដៃរួមមានជនជាតិអាមេរិកជាច្រើន ជនជាតិអ៊ីស្រាអែលរាប់ពាន់នាក់ ដូច្នេះលោកគិតថា លោក Nasrallah គួរតែទទួលទណ្ឌកម្ម។