បេក្ខជនប្រធានាធិបតីរបស់គណបក្សសាធារណរដ្ឋ លោក Donald Trump បាននិយាយកាលពីថ្ងៃសុក្រ ទី២៧ ខែកញ្ញា ថា លោកនឹងធ្វើការជាមួយ ទាំងអ៊ុយក្រែន និងរុស្ស៊ី ដើម្បីបញ្ចប់សង្រ្គាមរបស់ពួកគេ ខណៈលោកឈរនៅក្បែរប្រធានាធិបតីអ៊ុយក្រែន លោក Volodymyr Zelenskyy មុនពេលជំនួបនៅក្នុងទីក្រុងញូវយ៉ក។

ថ្លែងទៅកាន់អ្នកសារព័ត៌មាននៅនៅអគារ Trump Tower លោក Zelenskiy បាននិយាយថា លោកចង់ពិភាក្សាអំពី «ផែនការជ័យជម្នះ» របស់លោក សម្រាប់អ៊ុយក្រែនជាមួយ លោក Trump ក្នុងអំឡុងពេលជំនួបលើកដំបូងរបស់លោកជាមួយលោក Trump ចាប់តាំងពីឆ្នាំ២០១៩ មក។ លោក និយាយថា លោកបានជួបជាមួយ លោក Trump និងគូប្រជែងមកពីគណបក្សប្រជាធិបតេយ្យរបស់លោក ក្នុងការបោះឆ្នោតនៅថ្ងៃទី៥ ខែវិច្ឆិកា គឺអនុប្រធានាធិបតី លោកស្រី Kamala Harris ដោយសារតែ អ៊ុយក្រែន ត្រូវការការគាំទ្រយ៉ាងខ្លាំងពីសហរដ្ឋអាមេរិក ក្នុងការបន្តសង្រ្គាមជាមួយរុស្ស៊ី។

លោក Trump បានកោតសរសើរ លោក Zelenskiy ប៉ុន្តែបាននិយាយថា លោកក៏មានទំនាក់ទំនងរឹងមាំ ជាមួយប្រធានាធិបតីរុស្ស៊ី លោក Vladimir Putin ផងដែរ។

លោក Trump បាននិយាយថា «ខ្ញុំមានទំនាក់ទំនងល្អ ជាមួយអ្នក (លោក Zelenskyy) ហើយខ្ញុំក៏មានទំនាក់ទំនងល្អ ជាមួយប្រធានាធិបតី លោក Putin ដូចដែលអ្នកដឹងហើយ ។ លោកបានបញ្ជាក់ថា ប្រសិនបើលោកទទួលជ័យជម្នះក្នុងការបោះឆ្នោត លោកនឹងដោះស្រាយជម្លោះនេះឲ្យបានលឿនបំផុត។

លោក Zelenskiy និងលោក Trump បានឈរនៅក្បែរគ្នា ដោយប្រធានាធិបតីអ៊ុយក្រែន សម្លឹងមើល លោក Trump ម្តងម្កាល ក្នុងអំឡុងពេលសុន្ទរកថា ទៅកាន់អ្នកសារព័ត៌មាន។

លោក Zelenskyy បានប្រើប្រាស់ដំណើរទស្សនកិច្ចទៅកាន់សហរដ្ឋអាមេរិករបស់លោក ដើម្បីផ្សព្វផ្សាយ «ផែនការជ័យជម្នះ ដែលមន្ត្រីសហរដ្ឋអាមេរិក បាននិយាយថា ជាការស្នើសុំឡើងវិញសម្រាប់សព្វាវុធបន្ថែមទៀត និងការដកការរឹតត្បិតលើការប្រើប្រាស់មីស៊ីលរយៈចម្ងាយឆ្ងាយ។