​

រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយកាលពីថ្ងៃសុក្រ ទី២៧ ខែកញ្ញា ថា ជម្រើស ដែលភាគីនានានៅតំបន់មជ្ឈិមបូព៌ាធ្វើនៅប៉ុន្មានថ្ងៃខាងមុខនេះ នឹងកំណត់ផ្លូវណាដែលតំបន់នេះនឹងត្រូវដើរ និងផលវិបាកដ៏ជ្រៅ សម្រាប់ឆ្នាំខាងមុខ។

នៅក្នុងសន្និសីទសារព័ត៌មាន នៅខាងក្រៅមហាសន្និបាតអង្គការសហប្រជាជាតិនៅទីក្រុងញូវយ៉ក អ្នកការទូតជាន់ខ្ពស់របស់សហរដ្ឋអាមេរិករូបនេះ បាននិយាយថា ទីក្រុងវ៉ាស៊ីនតោន បានបញ្ជាក់យ៉ាងច្បាស់ថា ខ្លួនជឿថាផ្លូវឆ្ពោះទៅមុខគឺតាមរយៈផ្នែកការទូត ពុំមែនជម្លោះនោះទេ។

ម៉្យាងវិញទៀត លោក Blinken បាននិយាយថា លោកមានជំនួបដ៏ស្មោះត្រង់ និងសំខាន់មួយ ជាមួយរដ្ឋមន្ត្រីការបរទេសចិន លោក Wang Yi កាលពីថ្ងៃសុក្រ ហើយបានបញ្ជាក់ពីការព្រួយបារម្ភយ៉ាងខ្លាំងរបស់សហរដ្ឋអាមេរិក អំពីការគាំទ្ររបស់ប្រទេសចិនសម្រាប់មូលដ្ឋានឧស្សាហកម្មការពារជាតិរបស់រុស្ស៊ី។

លោក Blinken បាននិយាយថា លោកបានលើកឡើងពី «សកម្មភាពដ៏គ្រោះថ្នាក់ និងអស្ថិរភាព» របស់ចិន នៅសមុទ្រចិនខាងត្បូង និងបានពិភាក្សាអំពីការធ្វើឲ្យប្រសើរទំនាក់ទំនងរវាងយោធាសហរដ្ឋអាមេរិកនិងចិន មធ្យោបាយនានាដើម្បីបង្អាក់ដល់លំហូរគ្រឿងញៀនចូលទៅកាន់សហរដ្ឋអាមេរិក និងហានិភ័យដែលបង្កឡើងដោយបញ្ញាសិប្បនិម្មិត(AI)។