​

អនុប្រធានាធិបតីគណបក្សប្រជាធិបតេយ្យ លោកស្រី Kamala Harris បានចុះពិនិត្យនៅព្រំដែនសហរដ្ឋអាមេរិក-ម៉ិកស៊ិក ជាលើកដំបូងនៅក្នុងយុទ្ធនាការបោះឆ្នោតប្រធានាធិបតីឆ្នាំ២០២៤ របស់លោកស្រី កាលពីថ្ងៃសុក្រ ដោយអំពាវនាវឱ្យមានការរឹតបន្តឹងសិទ្ធិជ្រកកោនឱ្យកាន់តែតឹងរ៉ឹង និងប្តេជ្ញា បញ្ឈប់សារធាតុហ្វង់តានីល(fentanyl) មិនឱ្យចូលទៅសហរដ្ឋអាមេរិកជា ដែលជាអាទិភាពកំពូល។

លោកស្រី Harris បាននិយាយនៅក្នុងទីក្រុង Douglas រដ្ឋArizona ជាទីក្រុងជាប់ព្រំដែន មានមនុស្សតិចជាង ១៧.០០០នាក់ ជាកន្លែងដែលលោកស្រី បានចោទប្រកាន់គូប្រជែងគណបក្សសាធារណរដ្ឋ លោក Donald Trump ពី «ការបញ្ឆេះការព្រួយបារម្ភ និងការខ្វែងគំនិតគ្នា» ជុំវិញផលប៉ះពាល់នៃជនអន្តោប្រវេសន៍ទៅលើជីវិតជនជាតិអាមេរិក។

លោកស្រី Harris បានអំពាវនាវឱ្យមានវិធានការដាក់ទណ្ឌកម្មបន្ថែមទៀត សម្រាប់អ្នកដែលឆ្លងកាត់ព្រំដែនដោយខុសច្បាប់ បន្ទាប់ពីបម្រាមសិទ្ធិជ្រកកោនសម្រាប់អ្នកដែលចូលសហរដ្ឋអាមេរិកខុសច្បាប់ ត្រូវបានបង្កើតឡើងដោយប្រធានាធិបតី លោក Joe Biden នៅឆ្នាំនេះ។

លោកស្រី Harris បាននិយាយថា លោកស្រីនឹងមានចំណាត់ការបន្ថែមទៀតដើម្បីបិទព្រំដែន។ អ្នកដែលឆ្លងកាត់ព្រំដែនរបស់យើងដោយខុសច្បាប់ នឹងត្រូវបានចាប់ខ្លួន និងបញ្ជូនចេញ ហើយរារាំងមិនឱ្យចូលជាថ្មីម្តងទៀតក្នុងរយៈពេលប្រាំឆ្នាំ។

លោកស្រីនិយាយថា យើងនឹងបន្តការចោទប្រកាន់បទព្រហ្មទណ្ឌធ្ងន់ធ្ងរបន្ថែមទៀតប្រឆាំងអ្នករំលោភបំពានម្តងហើយម្តងទៀត ហើយប្រសិនបើនរណាម្នាក់មិនធ្វើសំណើសុំសិទ្ធិជ្រកកោននៅចំណុចចូលស្របច្បាប់ ហើយជំនួសឱ្យការឆ្លងព្រំដែនដោយខុសច្បាប់ ពួកគេនឹងត្រូវបានរារាំងមិនឱ្យទទួលបានសិទ្ធិជ្រកកោន។ ប៉ុន្តែលោកស្រី Harris ក៏បាននិយាយផងដែរថា គោលនយោបាយរបស់លោកស្រី នឹងបង្កើតផ្លូវសម្រាប់កម្មវិធីអន្តោប្រវេសន៍ដោយមនុស្សធម៌។