ក្រុមអាជ្ញាធរសហរដ្ឋអាមេរិកបាននិយាយកាលពីថ្ងៃសុក្រទី២៧ ខែកញ្ញាថា ចំនួនអ្នកស្លាប់បានកើនឡើងដល់៤៤នាក់នៅទូទាំងរដ្ឋចំនួន ៥ របស់សហរដ្ឋអាមេរិក ដែលរងការវាយប្រហារដោយព្យុះដ៏មានឥទ្ធិពល ហេលេន (Helene) បន្ទាប់ពីទឹកជំនន់ដ៏ខ្លាំងក្លាបានជំរុញឱ្យក្រុមអ្នកសង្គ្រោះបន្ទាន់ចាប់ផ្តើមប្រតិបត្តិការជួយសង្គ្រោះដ៏ធំ។

ផ្លូវ ផ្ទះ និងអាជីវកម្មជាច្រើនត្រូវទឹកលិច ភាគច្រើនត្រូវបានបំផ្លាញ បន្ទាប់ពីព្យុះសង្ឈរាHelene បានបោកបក់ជាព្យុះសង្ឃរាប្រភេទទី ៤ នៅជិតរដ្ឋធានី Tallahassee របស់រដ្ឋ Florida ពេញមួយយប់ ហើយបានកើនឡើងកម្លាំងនៅភាគខាងជើង។

យោងតាមគេហទំព័រតាមដានថាមពល poweroutage.us កាលពីថ្ងៃសុក្រ អតិថិជនជាង៤,២លាននាក់គ្មានថាមពលប្រើប្រាស់នៅទូទាំងរដ្ឋចំនួន ១០ ចាប់ពីរដ្ឋ Florida ដល់ រដ្ឋ អូហៃយ៉ូ (Ohio) ។ 

ស្របពេលព្យុះដ៏មានឥទ្ធិពលនេះបានស្រុតចុះកម្លាំងទៅជាព្យុះត្រូពិក និងបានក្លាយជាព្យុះស៊ីក្លូនក្រោយត្រូពិក ព្យុះនេះបានបន្តបំផ្លិចបំផ្លាញដោយនាំមកជាមួយនូវភ្លៀងធ្លាក់ខ្លាំង ដែលមជ្ឈមណ្ឌលជាតិសិក្សាព្យុះសង្ឃរាបាននិយាយថានឹងបណ្តាលឱ្យមានមហន្តរាយធ្ងន់ធ្ងរ និងអាចគំរាមកំហែងដល់អាយុជីវិត និងទឹកជំនន់ក្នុងតំបន់នេះ៕