យោងតាមបុគ្គល២រូបដែលដឹងពីការសន្ទនា បានឲ្យដឹងថា   លោកប្រធានាធិបតី Joe Biden បានប្រាប់សម្ព័ន្ធមិត្តក្នុងសប្តាហ៍នេះថា លោកមិនជឿថា មេដឹកនាំអ៊ីស្រាអែល Benjamin Netanyahu ចង់បានការបញ្ឈប់អរិភាពជាមួយក្រុមហេសបូឡា នៅលីបង់ទេ ដោយបង្ហាញពីការខកចិត្តកាន់តែខ្លាំង ខណៈផែនការបទឈប់បាញ់ដែលបានស្នើឡើងបានបរាជ័យ។

មនុស្សម្នាក់ដែលនិយាយជាមួយលោក Biden បាននិយាយថា លោកប្រធានាធិបតីមានអារម្មណ៍ថា លោក Netanyahu បានធ្វើឱ្យអាម៉ាស់មុខទាំង ប្រមុខការបរទេសអាមេរិក លោក Antony Blinken ទាំងលោក Biden ដោយច្រានចោលសំណើបទឈប់បាញ់ជាមួយក្រុមហេសបូឡា។  

ដំបូងឡើយ លោក Netanyahu បានប្រាប់មន្ត្រីអាមេរិកថា លោកគាំទ្រការផ្អាកមួយ ក្នុងការប្រយុទ្ធជាមួយក្រុមសកម្មប្រយុទ្ធដែលមានមូលដ្ឋាននៅលីបង់ បន្ទាប់មកបានច្រានចោលសំណើបទឈប់បាញ់នេះ នៅពេលបញ្ហានេះត្រូវបានផ្សព្វផ្សាយជាសាធារណៈ។  

ការលាតត្រដាងនេះកើតឡើងស្របពេលមានការវាយប្រហារកាន់តែខ្លាំងរបស់អ៊ីស្រាអែលទៅលើក្រុមហេសបូឡា កាលពីថ្ងៃសុក្រដោយបើកការវាយប្រហារទៅលើទីស្នាក់ការកណ្តាលរបស់ក្រុមសកម្មប្រយុទ្ធនៅទីក្រុងបេរូត។  

គោលដៅនៃការវាយប្រហារនោះ គឺមេដឹកនាំក្រុមហេសបូឡា លោក Hassan Nasrallah នេះបើយោងតាមមន្ត្រីអាមេរិកមួយរូប មន្ត្រីអ៊ីស្រាអែលពីររូប និងមនុស្សពីរនាក់ផ្សេងទៀត ដែលបានបញ្ជាក់ពីការវាយប្រហារនេះ៕