លទ្ធផលបឋមបានបង្ហាញ អ្នកបោះឆ្នោតនៅប្រទេសអូទ្រីស បានប្រគល់ជ័យជម្នះការបោះឆ្នោតសកលលើកដំបូងមិនធ្លាប់មានដល់គណបក្សសេរីភាព (FPO) ស្តាំនិយមជ្រុល កាលពីថ្ងៃអាទិត្យ (២៩ កញ្ញាំ) ដោយបង្ហាញពីកំណើនយ៉ាងខ្លាំងក្លានៃការគាំទ្រសម្រាប់គណបក្សស្តាំនិយមប្រកាន់ជំហរតឹងនៅអឺរ៉ុប ដែលជំរុញដោយក្ដីបារម្ភពីកម្រិតដ៏លើសលប់នៃអន្តោប្រវេសន៍។

គណបក្ស FPO ដែលងាកទៅខាងរុស្ស៊ី និងជាអ្នករិះគន់សហភាពអឺរ៉ុបមួយនេះ បាននាំមុខបន្តិចក្នុងការស្ទង់មតិអស់រយៈពេលជាច្រើនខែលើគណបក្សប្រជាជនអូទ្រីស (OVP) អភិរក្សនិយម ដែលកំពុងកាន់អំណាច របស់លោកអធិការបតី ខាល នេហាំមើ (Karl Nehammer) នៅក្នុងយុទ្ធនាការមួយដែលគ្របដណ្តប់ដោយអន្តោប្រវេសន៍ និងការព្រួយបារម្ភពីសេដ្ឋកិច្ច។

ដឹកនាំដោយលោក ហើប៊ឺត ឃីកខល (Herbert Kickl) វ័យ ៥៥ឆ្នាំ គណបក្សស្តាំនិយមជ្រុល FPO បានឈ្នះ ២៨,៨% នៃការបោះឆ្នោត នាំមុខគណបក្សអភិរក្សនិយម OVP ដែលទទួលបានសំឡេង ២៦,៣% និងគណបក្សសង្គមប្រជាធិបតេយ្យ (SPO) កណ្តាលនិយមឆ្វេង ដែលទទួលបានសំឡេង ២១,១% នេះបើយោងតាមការព្យាកររបស់ប្រព័ន្ធផ្សព្វផ្សាយ ORF។

គណបក្សស្តាំនិយមជ្រុលមួយនេះបានប្រឹងប្រែងសម្រួលរូបភាព និងពង្រីកការអំពាវនាវរបស់ខ្លួន ប៉ុន្តែលោក Kickl នៅតែជាអ្នកនយោបាយបែបញុះញង់ និងមានភាពច្របូកច្របល់ ក្នុងក្រសែភ្នែកមេដឹកនាំបក្សផ្សេងទៀត ដែលអ្នកទាំងនោះបានរួបរួមគ្នាភ្លាមៗដើម្បីបដិសេធគំនិតនៃការបង្កើតសម្ព័ន្ធជាមួយលោក។ ប្រសិនបើលោក Kickl មិនអាចបញ្ចុះបញ្ចូលភាគីផ្សេងទៀតឱ្យធ្វើជាសម្ព័ន្ធមិត្តជាមួយខ្លួនបានទេនោះ នេះអាចបញ្ចប់ក្តីសង្ឃឹមរបស់បក្ស FPO ក្នុងការបង្កើតរដ្ឋាភិបាល និងអាចនាំទៅរកសម្ព័ន្ធនៃបណ្ដាគណបក្សដែលប្រកាន់ជំហរកណ្ដាលបន្ថែមទៀត៕