មន្ត្រីម្នាក់ក្នុងយុទ្ធនាការបក្សប្រជាធិបតេយ្យ បាននិយាយកាលពីថ្ងៃអាទិត្យ (២៩ កញ្ញា) ថា យុទ្ធនាការបោះឆ្នោតប្រធានាធិបតីអាមេរិករបស់លោកស្រី Kamala Harris រៃអង្គាសប្រាក់បានចំនួន ៥៥លានដុល្លារ ក្នុងអំឡុងពេលព្រឹត្តិការណ៍ចំនួនពីរប៉ុណ្ណោះកាលពីចុងសប្តាហ៍។

មន្ត្រីដែលសុំមិនបញ្ចេញឈ្មោះនោះនិយាយថា បេក្ខភាពបក្សប្រជាធិបតេយ្យ និងជាអនុប្រធានាធិបតីអាមេរិក លោកស្រី Harris រៃអង្គាសប្រាក់បាន ២៧លានដុល្លារ នៅក្នុងព្រឹត្តិការណ៍រៃអង្គាសមួយនៅវិមានវិចិត្រសិល្បៈក្នុងទីក្រុង សាន់ហ្វ្រាន់ស៊ីស្កូ កាលពីថ្ងៃសៅរ៍។ បន្ទាប់មកលោកស្រី Harris ទទួលបានប្រាក់ចំនួន ២៨លានដុល្លារ បន្ថែមទៀតក្នុងព្រឹត្តិការណ៍មួយនៅកណ្តាលទីក្រុង ឡូសអែនជើលេស (Los Angeles)។

នៅព្រឹត្តិការណ៍ទាំងនោះ លោកស្រី Harris បានបើកបង្ហាញគោលនយោបាយសេដ្ឋកិច្ចរបស់ខ្លួន ដោយហៅខ្លួនឯងថាជាអ្នកមូលធននិយម។ លោកស្រីបានប្រាប់ម្ចាស់ជំនួយថាខ្លួននឹងឈ្នះការបោះឆ្នោត ប៉ុន្តែព្រមានថាលោកស្រីក៏ជាអ្នកចាញ់ប្រៀបក្នុងការប្រជែងតំណែងសេតវិមាននេះផងដែរ ដោយនៅសល់តែប៉ុន្មានសប្តាហ៍ទៀតប៉ុណ្ណោះ។

យុទ្ធនាការប្រធានាធិបតីរបស់លោកស្រី Harris និងគណបក្សប្រជាធិបតេយ្យ រៃអង្គាសប្រាក់សរុបបានចំនួន ៣៦១លានដុល្លារ ក្នុងខែសីហា ដែលធ្វើឱ្យលោកស្រីមានប្រៀបខាងសាច់ប្រាក់យ៉ាងច្បាស់លើគូប្រជែងមកពីបក្សសាធារណរដ្ឋគឺលោក Donald Trump ដែលយុទ្ធនាការរបស់លោករៃអង្គាសប្រាក់បានចំនួន ១៣០លានដុល្លារប៉ុណ្ណោះក្នុងខែសីហា រួមគ្នាជាមួយគណបក្សសាធារណរដ្ឋ៕