ប្រធានសភាអ៊ីរ៉ង់ លោក ម៉ូហាម៉េដ បេឃើ ខាលីបាហ្វ ( Mohammad Baqer Qalibaf) កាលពីថ្ងៃអាទិត្យ បានជំរុញឲ្យស្ថាប័ននីតិប្បញ្ញត្តិ និងរដ្ឋាភិបាលនៃរដ្ឋមូស្លីម ប្រកាន់ជំហរ «រារាំង» ប្រឆាំងនឹង អ៊ីស្រាអែល ដើម្បីទប់ស្កាត់ការរំលោភច្បាប់អន្តរជាតិ និងសិទ្ធិមនុស្ស នាពេលអនាគត។

ក្នុងអំឡុងពេលសន្ទនាតាមទូរស័ព្ទជាមួយសមភាគីលីបង់លោក ណាប៊ី ប៊ឺរី ( Nabih Berri) លោក ខាលីបាហ្វ បានសម្តែងការសោកស្តាយចំពោះមេដឹកនាំក្រុមហេសបូឡា លោក ណាសសាន់ ណាស្រាឡា (Hassan Nasrallah) ដែលត្រូវបានសម្លាប់ក្នុងការវាយប្រហាររបស់អ៊ីស្រាអែលលើទីក្រុង Dahieh ជាយក្រុងបេរូត ( Beirut) កាលពីថ្ងៃសុក្រ។ ការវាយប្រហារនេះ ក៏បានសម្លាប់មេបញ្ជាការជាន់ខ្ពស់មកពីកងឆ្មាំបដិវត្តន៍ឥស្លាមអ៊ីរ៉ង់ លោក អាបាស នីលហ្វូរៀសាន (Abbas Nilforoushan)។ នេះបើយោងតាមទីភ្នាក់ងារព័ត៌មានផ្លូវការរបស់អ៊ីរ៉ង់ IRNA ។

លោក ខាលីបាហ្វ បានសង្កត់ធ្ងន់លើតម្រូវការសម្រាប់ការឆ្លើយតបដោយសម្របសម្រួលពីបណ្តារដ្ឋមូស្លីមដោយនិយាយថា៖«យើងត្រូវតែបង្កើតការរារាំងនិងបន្តសកម្មភាពផ្លូវច្បាប់ ដើម្បីធានាដល់ការបញ្ឈប់ការរំលោភបំពានដោយអ៊ីស្រាអែល។

លោកបានពិពណ៌នា លោក ណាស្រាឡាថា ជា «អ្នកប្រាជ្ញដ៏អស្ចារ្យ និងជាមេបញ្ជាការដ៏មានឥទ្ធិពល» ដោយហៅ ការស្លាប់របស់លោក ជាការបាត់បង់ដ៏សំខាន់សម្រាប់ទាំងក្រុមហេសបូឡា និងសហគមន៍មូ ស្លីម។

លើសពីនេះទៀត លោក ខាលីបាហ្វ បានថ្កោលទោសការវាយប្រហារតាមផ្លូវអាកាសនាពេលថ្មីៗនេះរបស់អ៊ីស្រាអែលនៅលីបង់ ដែលបណ្តាលឲ្យមានអ្នកស្លាប់ និងរបួសជាច្រើន ដោយបញ្ជាក់ឡើងវិញនូវការប្តេជ្ញាចិត្តរបស់អ៊ីរ៉ង់ក្នុងការគាំទ្រប្រទេសលីបង់ ក្នុងគ្រាចាំបាច់។