ចំពេលមានសង្រ្គាមរុស្ស៊ី-អ៊ុយក្រែនដែលកំពុងបន្តមាន អ្នកនាំពាក្យរបស់ប្រធានាធិបតីរុស្ស៊ី លោក Vladimir Putin គឺលោក Dmitry Peskov បានចោទប្រកាន់ប្រទេសលោកខាងលិចពីការធ្វើឲ្យជម្លោះអូសបន្លាយ ដោយបន្ថែមថា ទីក្រុងមូស្គូ «ត្រូវតែត្រៀមខ្លួន» ដើម្បីអនុវត្តគោលការណ៍នុយក្លេអ៊ែរ ដែលបានកែប្រែរបស់ខ្លួន។ នេះបើយោងតាមការចុះផ្សាយរបស់សារព័ត៌មានរដ្ឋរុស្ស៊ី Tass កាលពីថ្ងៃអាទិត្យ (ទី២៩ ខែកញ្ញា)។

សារព័ត៌មាននោះបានរាយការណ៍ថា លោក Peskov បាននិយាយនៅក្នុងបទសម្ភាសន៍ជាមួយប្រព័ន្ធផ្សព្វផ្សាយរដ្ឋរុស្ស៊ី VGTRK ថា៖ «យើងអាចមើលឃើញយ៉ាងច្បាស់ពីរបៀប ដែលបណ្តាប្រទេសលោកខាងលិចកំពុងចូលរួមក្នុងជម្លោះអ៊ុយក្រែនកាន់តែខ្លាំងឡើង។ ពួកគេមិនបានបញ្ឈប់ជម្លោះនេះទេ។ ផ្ទុយទៅវិញ ពួកគេប្រកាសពីបំណងរបស់ពួកគេ ក្នុងការជំរុញឲ្យកាន់តែខ្លាំងក្លា ដើម្បីជួយអ៊ុយក្រែនឲ្យឈ្នះ»។

គួរបញ្ជាក់ថា សមាជិកនៃអង្គការសន្ធិសញ្ញាអាត្លង់ទិកខាងជើង (NATO) បានផ្តល់ជំនួយការទូត និងយោធាដល់អ៊ុយក្រែន អឡុងពេលមានសង្រ្គាម បន្ទាប់ពីរុស្ស៊ីបានលុកលុយប្រទេសអឺរ៉ុបខាងកើត ក្នុងខែកុម្ភៈ ឆ្នាំ២០២២។

បើយោងតាមយុទ្ធនាការអន្តរជាតិ ដើម្បីលុបបំបាត់អាវុធនុយក្លេអ៊ែរ (ICANW) បានឲ្យដឹងថា ភាពតានតឹង រវាងបណ្ដាប្រទេសសមាជិករបស់អង្គការណាតូ និងវិមានក្រឹមឡាំង បានបន្តមានឥតថមថយ ខណៈដែលបណ្ដាមេដឹកនាំណាតូ បានព្រមានកាន់តែខ្លាំងឡើងៗថា ជម្លោះដោយផ្ទាល់ជាមួយទីក្រុងមូស្គូ គឺជាគ្រោះថ្នាក់ជាក់ស្តែង ដោយសារប្រទេសនេះមានក្បាលគ្រាប់នុយក្លេអ៊ែរច្រើនជាងប្រទេសដទៃទៀត។

ហើយការព្រមាននេះកើតមានឡើង បន្ទាប់ពីលោក Putin និងបណ្ដាមន្ត្រីជាន់ខ្ពស់រុស្ស៊ី បានគំរាមកំហែងម្តងហើយម្តងទៀត ជុំវិញការប្រើប្រាស់នុយក្លេអ៊ែរប្រឆាំងនឹងទីក្រុងគីវ និងសម្ព័ន្ធមិត្តលោកខាងលិចរបស់ប្រទេសនេះ៕