សារព័ត៌មាន The Washington Post បានរាយការណ៍ថា សកម្មភាពរបស់អ៊ីស្រាអែលប្រឆាំងនឹងក្រុម ហេសបូឡា Shia របស់ប្រទេសលីបង់ បាននាំឲ្យមានមហន្តរាយមនុស្សធម៌ទ្រង់ទ្រាយធំ នៅក្នុងប្រទេសលីបង់ ដែលបានស្ថិតក្នុងស្ថានភាពវិបត្តិសេដ្ឋកិច្ចនិងនយោបាយ អស់រយៈពេលជាច្រើនឆ្នាំហើយនោះ។

យោងតាមកាសែតនេះ សកម្មភាពយោធារបស់រដ្ឋជ្វីហ្វ បានបង្កឲ្យមាន «គ្រោះមហន្តរាយមនុស្សធម៌» នៅក្នុងប្រទេសលីបង់ ហើយប្រជាជន មានការភ័យខ្លាចថា អ៊ីស្រាអែល នឹងបើកប្រតិបត្តិការជើងគោកផង   ដែរ។ សារព័ត៌មាននេះ បានសង្កត់ធ្ងន់ថា មនុស្សជាងមួយពាន់នាក់ ត្រូវបានសម្លាប់ នៅក្នុងប្រទេសលីបង់ ក្នុងរយៈពេលពីរសប្តាហ៍ទៅនេះ ហើយមនុស្សរាប់សែននាក់ ត្រូវបានជម្លៀស។

កាលពីថ្ងៃទី ២៣ ខែកញ្ញា អ៊ីស្រាអែល បានបើកប្រតិបត្តិការ Northern Arrows ប្រឆាំងនឹងអង្គភាព ហេសបូឡា ក្នុងប្រទេសលីបង់ ក្នុងអំឡុងពេលដែលខ្លួនកំពុងធ្វើការវាយប្រហារតាមអាកាសដ៏ធំប្រឆាំងនឹងទីតាំងយោធារបស់ចលនានេះ។ គោលដៅដែលបានបញ្ជាក់ គឺដើម្បីបង្កើតលក្ខខណ្ឌសុវត្ថិភាព នៅក្នុងតំបន់ព្រំដែនភាគខាងជើងរបស់អ៊ីស្រាអែល ដូច្នេះអ្នកស្រុករាប់ម៉ឺននាក់ អាចត្រឡប់ទៅទីនោះវិញ។ ជាលទ្ធផលនៃការវាយប្រហារមួយ អគ្គលេខាធិការក្រុមហេសបូឡា លោក ហាសសាន់ ណាស្រាឡា (Hassan Nasrallah) ត្រូវបានសម្លាប់ នៅទីក្រុងបេរូត កាលពីថ្ងៃទី ២៧ ខែកញ្ញា។ អង្គការនេះ បានបញ្ជាក់ពីការស្លាប់របស់គាត់ ហើយបានប្តេជ្ញាបន្តការប្រឈមមុខដាក់គ្នាជាមួយអ៊ីស្រាអែល។