រដ្ឋមន្ត្រីការបរទេសលីទុយអានី លោក Gabrielius Landsbergis បានសម្ដែងការយល់ឃើញរបស់លោកជាមួយប្រព័ន្ធផ្សព្វផ្សាយ Fox News Digital ក្នុងនាមជាបុគ្គលមួយរូប ពាក់ព័ន្ធនឹងការប៉ះពាល់តាមព្រំដែន ដោយសារការលុកលុយលើប្រទេសអ៊ុយក្រែន ក្នុងនោះរួមទាំងការព្រួយបារម្ភ ដែលថា រុស្ស៊ីអាចបង្ក «ការខូចខាតខ្លាំងក្លាទៀត» ទោះបីជាឥទ្ធិពលរបស់ប្រទេសនេះធ្លាក់ចុះក៏ដោយ។

លោក Landsbergis បាននិយាយថា៖ «នៅក្នុងឆ្នាំ២០១៤ មុនពេលមានសង្រ្គាមលើកដំបូង នៅអ៊ុយក្រែន ប្រជាជននៅសហរដ្ឋអាមេរិក ហើយនិងបណ្ដាមេដឹកនាំលោកខាងលិច នឹងនាំគ្នានិយាយថា រុស្ស៊ីកំពុងធ្លាក់ចុះ ប្រទេសនេះស្ថិតនៅលើផ្លូវធ្លាក់ចុះហើយ ឥទ្ធិពលក្នុងតំបន់របស់ប្រទេសនេះកំពុងធ្លាក់ចុះ ពោលគឺមិនមែនជាមហាអំណាចពិភពលោកទៀតទេ។ ប៉ុន្តែនៅក្នុងដំណើរផ្លូវធ្លាក់ចុះនេះ ប្រទេសនេះអាចបង្កការខូចខាតយ៉ាងខ្លាំងក្លាដល់អ្នកជិតខាងរបស់ខ្លួន»។

លោកបានបន្ថែមថា «វាមិនមែនជាការវាយតម្លៃដ៏ត្រឹមត្រូវនោះទេ» ដោយលើកឡើងថា បើទោះបីជាប្រទេសរុស្ស៊ីកំពុងធ្លាក់ចុះខ្លាំង ដូចបណ្ដាមេដឹកនាំលោកខាងលិចគិតក៏ដោយ ក៏ «ការបង្កចលាចល» មុនបាត់បង់ឥទ្ធិពលនៃប្រទេសមហាអំណាចបែបនេះ អាច «មានរយៈពេលរាប់ទសវត្សរ៍ទៀត»។ លោកបានបញ្ជាក់ថា៖ «តើនរណាអាចដឹងបានថា ពេលណា ឬដោយវិធីណា ដែលភាពវឹកវរនេះនឹងឈប់? វាជារឿងពិបាកណាស់ ក្នុងការស្រមើស្រមៃ ពោលគឺទស្សន៍ទាយឲ្យបានត្រឹមត្រូវនោះ»។

គួរបញ្ជាក់ថា លីទុយអានី នៅតែជាប្រទេសដែលនិយាយឥតលាក់លៀមច្រើនជាងគេបំផុត នៅអឺរ៉ុបខាងកើត អំឡុងការលុកលុយរបស់រុស្ស៊ីលើអ៊ុយក្រែននេះ សូម្បីតែមុនពេលការលុកលុយនៅតំបន់គ្រីម៉ា ឆ្នាំ២០១៤។ ផ្នែកមួយនៃជំហររបស់ខ្លួន គឺទទួលយកដោយមោទនភាពនូវតួនាទីរបស់អង្គការណាតូ (NATO)៕