កងពន្លត់អគ្គិភ័យបានឲ្យដឹងថា ចំហេះព្រៃដែលបង្កឡើងដោយខ្យល់បក់ខ្លាំង បានឆាបឆេះយ៉ាងសន្ធោសន្ធៅ លើតំបន់ភ្នំព្រៃដ៏ក្រាស់ ក្នុងតំបន់ Corinth ភាគកណ្តាលប្រទេសក្រិក នៅព្រឹកថ្ងៃចន្ទ (ទី៣០ ខែកញ្ញា)។

អ្នកពន្លត់អគ្គិភ័យរាប់រយនាក់ដែលមានជំនួយពីយន្តហោះ ៩គ្រឿង បានប្រឹងទប់ទល់អគ្គិភ័យ ដែលបានឆាបឆេះឡើង កាលពីថ្ងៃអាទិត្យ (ទី២៩ ខែកញ្ញា) ជិតទីក្រុងមាត់សមុទ្រ Xylokastro នៅលើឧបទ្វីប Peloponnese ចម្ងាយប្រហែល ១២០គីឡូម៉ែត្រ ភាគខាងលិចទីក្រុងអាតែន។

ហើយជាមួយគ្នានេះ ក្រសួងការពារពលរដ្ឋក្រិក បានឲ្យដឹងថា អាជ្ញាធរបានរកឃើញសពមនុស្ស ២នាក់ ខណៈអ្នកស្រុកនៃភូមិជាច្រើន នៅក្បែរនោះ ត្រូវបានប្រាប់ឲ្យជម្លៀសចេញ កាលពីថ្ងៃអាទិត្យ៕