អ្នកកាន់ក្បាលម៉ាស៊ីនបន្ទាប់របស់អង្គការណាតូ (NATO) គឺលោក Mark Rutte នឹងត្រូវការជំនាញកសាងសម្ព័ន្ធភាពទាំងអស់ ដែលលោកបានធ្លាប់ធ្វើ ក្នុងនាមជានាយករដ្ឋមន្ត្រីហូឡង់ ដើម្បីរក្សាសម្ព័ន្ធភាពលោកខាងលិចឲ្យវេញគ្នាជាធ្លុងមួយ ចំពេលមានសង្រ្គាមនៅអ៊ុយក្រែន ការភ័យខ្លាចចំពោះចំណាត់ការបន្ទាប់របស់ទីក្រុងមូស្គូ និងភាពមិនច្បាស់លាស់ខាងនយោបាយ នៅទីក្រុងវ៉ាស៊ីនតោន។

នៅថ្ងៃអង្គារ (ទី១ ខែតុលា) លោក Rutte ត្រូវចូលកាន់តំណែងជាអគ្គលេខាធិការនៃអង្គការសន្ធិសញ្ញាអាត្លង់ទិកខាងជើង ដោយស្នងតំណែងពីលោក Jens Stoltenberg របស់ប្រទេសន័រវ៉ែស ដោយនេះជាលើកដំបូងហើយ ក្នុងរយៈពេល ១ទសវត្សរ៍ដែលតួនាទីកំពូលរបស់អង្គការណាតូ នឹងផ្លាស់ប្តូរអ្នកកាន់។

ឥឡូវនេះ មនុស្សភាគច្រើនពឹងលើលោក Rutte អាចបង្កើតការឯកភាពគ្នា នៅក្នុងសម្ព័ន្ធភាព ដែលមានសមាជិក ៣២ប្រទេសនេះ។ សមត្ថភាពរបស់សម្ធ័ន្ធភាព ក្នុងការការពារប្រជាជនជិត ១ពាន់លាននាក់នៅក្រោមការការពាររបស់ខ្លួន មិនត្រឹមតែពឹងផ្អែកលើកម្លាំងយោធាប៉ុណ្ណោះទេ ប៉ុន្តែថែមទាំងលើការរួបរួមផ្នែកនយោបាយផងដែរ។

ហើយបញ្ហាប្រឈមជាច្រើន សម្រាប់លោក Rutte មានដូចជា លទ្ធភាពនៃការវិលត្រឡប់ទៅកាន់អំណាចវិញរបស់អ្នកដែលមិនគាំទ្រណាតូ គឺលោក Donald Trump ក្នុងនាមជាប្រធានាធិបតីសហរដ្ឋអាមេរិក ដែលជាមហាអំណាចដ៏លេចធ្លោរបស់សម្ព័ន្ធភាពនេះ ក៏ដូចជាការអំពាវនាវពីសម្ព័ន្ធមិត្តអឺរ៉ុបខាងកើតសុំឲ្យមានជំនួយបន្ថែមទៀត ដើម្បីការពារប្រឆាំងនឹងប្រទេសរុស្ស៊ី និងការសុំជំនួយយោធាបន្ថែមទៀតពីអ៊ុយក្រែន ដែលជាប្រទេសមិនមែនសមាជិករបស់អង្គការណាតូ។

យ៉ាងណាក្ដី បណ្ដាមន្ត្រីរបស់អង្គការណាតូ និងអ្នកការទូតនានា រំពឹងថា លោក Rutte នឹងបន្តគោលនយោបាយអាទិភាពរបស់លោក Stoltenberg ដោយប្រមូលផ្តុំការគាំទ្រដល់ទីក្រុងគីវ ជំរុញឲ្យប្រទេសមាជិកអង្គការណាតូចំណាយប្រាក់បន្ថែមលើវិស័យការពារជាតិ និងធ្វើឲ្យសហរដ្ឋអាមេរិកមានចំណែកក្នុងសន្តិសុខអឺរ៉ុប៕