ក្នុងបទសម្ភាសន៍មួយ នៅថ្ងៃចន្ទ (ទី៣០ ខែកញ្ញា) នេះ ប្រមុខអង្គការណាតូ (NATO) ដែលជិតផុតអាណត្តិ គឺលោក Jens Stoltenberg បានប្រាប់សារព័ត៌មាន Reuters ថា សមាជិកអង្គការណាតូ មិនគួរត្រូវបានរារាំងនោះឡើយ ក្នុងការផ្តល់ជំនួយយោធាបន្ថែមទៀតដល់ប្រទេសអ៊ុយក្រែន ដោយសារតែ «វោហាសាស្ត្រនុយក្លេអ៊ែរដែលធ្វើឡើងដោយមិនប្រុងប្រយ័ត្ន» ពីសំណាក់ប្រធានាធិបតីរុស្ស៊ី លោក Vladimir Putin។ 

លោក Stoltenberg បាន និងកំពុងប្រតិកម្មទៅនឹងការប្រកាសរបស់លោក Putin កាលពីសប្តាហ៍មុន ដែលថា ប្រទេសរុស្ស៊ីអាចប្រើប្រាស់អាវុធនុយក្លេអ៊ែរ ប្រសិនបើខ្លួនត្រូវបានវាយប្រហារដោយមីស៊ីលមិនមែននុយក្លែអែរ ហើយថា ទីក្រុងមូស្គូនឹងពិចារណាការវាយប្រហារណាមួយលើខ្លួនដែលគាំទ្រដោយមហាអំណាចនុយក្លេអ៊ែរថា ជាការវាយប្រហាររួមគ្នា។

ការព្រមានរបស់លោក Putin បានកើតឡើងនៅពេលដែលសហរដ្ឋអាមេរិក និងសម្ព័ន្ធមិត្ត ពិចារណាថា តើត្រូវអនុញ្ញាតឲ្យអ៊ុយក្រែនបាញ់មីស៊ីលមិនមែននុយក្លេអ៊ែររបស់លោកខាងលិចចូលទៅក្នុងដែនដីរុស្ស៊ីដែរ ឬយ៉ាងណា។ ទីក្រុងគីវ និយាយថា ខ្លួនចង់ទទួលបានការអនុញ្ញាតឲ្យវាយប្រហារលើគោលដៅនានា ដែលជាផ្នែកនៃកិច្ចខិតខំប្រឹងប្រែងទប់ទល់នឹងសង្គ្រាមរបស់រុស្ស៊ី។

លោក Stoltenberg ដែលត្រូវប្រគល់ការដឹកនាំរបស់អង្គការណាតូទៅឲ្យអតីតនាយករដ្ឋមន្ត្រីហូឡង់ លោក Mark Rutte នៅថ្ងៃអង្គារ បន្ទាប់ពីកាន់តំណែង ១ទសវត្សរ៍ បាននិយាយថា៖ «អ្វីដែលយើងបានឃើញ គឺជាគំរូនៃវោហាសាស្ត្រ និងសារនុយក្លេអ៊ែររបស់រុស្ស៊ីដែលធ្វើឡើងដោយមិនប្រុងប្រយ័ត្ន។ ពួកគេមិនបានទទួលជោគជ័យទេ ហើយឧទាហរណ៍ចុងក្រោយនេះ មិនគួររារាំងសម្ព័ន្ធមិត្តណាតូពីការគាំទ្រដល់អ៊ុយក្រែននោះឡើយ»៕