គិតមកដល់ថ្ងៃទី១ ខែតុលានេះ ប្រជាពលរដ្ឋទីជិតទីឆ្ងាយ បាននាំគ្នាចាកចេញពីរាជធានីភ្នំពេញ ដោយប្រើមធ្យោបាយផ្សេងៗគ្នា និងមួយចំនួនបានប្រើប្រាស់សេវារថយន្តក្រុង​ដោយឥតគិតថ្លៃ​ដែល​ផ្តល់​ជូនរបស់ប្រមុខរាជរដ្ឋាភិបាលកម្ពុជា ដើម្បីទៅជួបជុំគ្រួសារ សាច់ញាតិនៅ​ស្រុក​កំណើត​រៀង​ៗ​ខ្លួន ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ។

លោក វណ្ណ នីដា មានស្រុកកំណើតនៅខេត្តតាកែវ បច្ចុប្បន្នជា​បុគ្គលិក​ក្រុម​ហ៊ុន​មួយ​នៅ​រាជ​ធានី​ភ្នំពេញ បានឲ្យព័ត៌មាន ប៊ីធីវី ដឹងថា នេះជាលើកទី១ ដែលបានប្រើប្រាស់​សេវារ​ថយន្ត​ក្រុង​ដោយ​មិន​គិត​ថ្លៃ និងមានអារម្មណ៍ថា រំភើបសប្បាយរីករាយដែលរដ្ឋាភិបាលផ្តល់​ជូនដោយមិន​តម្រូវ​ឲ្យ​បង់​ថ្លៃ​អ្វីទាំងអស់ ថែមទាំងមានការផ្តល់ជូនបន្ថែមនូវភេសជ្ជះផងដែរ។ លោកបាន និយាយ​ទៀត​ថា ការជិះរថយន្តក្រុង គឺមានភាពងាយស្រួល ត្រជាក់ និងមានសុវត្ថិភាពថែមទៀត។ ជាពិសេស អាច​កាត់បន្ថយការចំណាយបានច្រើន ខណៈកាលមិនទាន់បានប្រើប្រាស់រថយន្តសាធារណៈនេះ លោកត្រូវចំណាយថវិកាយ៉ាងហោចណាស់ ៩ម៉ឺនរៀល ដើម្បីធ្វើដំណើរ​ទៅ​ស្រុក​កំណើត​នៅ​ខេត្ត​តាកែវ​។

ក្រុមប្រជាពលរដ្ឋដទៃផ្សេងទៀត ដែលជិះរថយន្តក្រុងទៅកាន់គោលដៅដូចគ្នានេះ បានលើក​ឡើង​ស្រដៀងគ្នា ពិតជាអរគុណដល់រាជរដ្ឋាភិបាល ដែលបានគិតគូរសុខទុករបស់ប្រជាពលរដ្ឋ ដោយ​ផ្តល់ជារថយន្តក្រុងដឹកជញ្ជូនពលរដ្ឋទៅលេងស្រុកកំណើតជួបជុំគ្រួសារ ដែលអាច​សន្សំ​សំចៃ​ថវិកាបានមួយចំនួនផងដែរ។

លោក កែវ សំអាង ប្រធានក្រុមដឹកជញ្ជូនប្រចាំខណ្ឌមានជ័យ សង្កាត់ចាក់អង្រែលើ បានមាន​ប្រសាសន៍​ឲ្យ​ដឹងថា សម្រាប់សេវាដឹកជញ្ជូនប្រជាពលរដ្ឋឥតគិតថ្លៃក្នុងគោលដៅរបស់លោក រួមមាន ខេត្តកណ្តាល និងខេត្តតាកែវ។ លោកបានបន្តថា គិតចាប់ពីព្រលឹម រហូតមក​ដល់​ពេល​នេះ ឃើញមានប្រជាពលរដ្ឋយ៉ាងច្រើនកុះករ និងទឹកមុខសប្បាយរីករាយ ក្នុងការជិះរថយន្ត​ក្រុង​ដោយ​មិន​អស់ប្រាក់នេះ។

លោកបានបញ្ជាក់ថា រថយន្តក្រុងដឹកអ្នកដំណើរទាំងអស់ ពេលទៅដល់គោលដៅ នឹងនៅរង់​ចាំ​ដល់​ថ្ងៃ​ចេញ​ដំណើរត្រឡប់មករាជធានីភ្នំពេញវិញផងដែរ។ ចំពោះម៉ោង​ចេញ​ដំណើរ​ទាំង​ចេញ​ពី​រាជ​ធានី​ភ្នំពេញទៅខេត្ត និងចេញពីខេត្តមករាជធានីភ្នំពេញ គឺដូចគ្នា ចាប់ពីម៉ោង ចាប់ពីម៉ោង ៦:៣០​ព្រឹក រហូតដល់ម៉ោង ១១:៣០នាទីថ្ងៃត្រង់។

គិតចាប់ពីថ្ងៃទី២៩ ខែកញ្ញា ដល់ថ្ងៃទី៤ ខែតុលា ឆ្នាំ២០២៤នេះ រាជរដ្ឋាភិបាលកម្ពុជា តាមរយៈ​រដ្ឋបាល​រាជ​ធានីភ្នំពេញ បានរៀបចំរថយន្តក្រុងសរុបចំនួន ៦៥៣គ្រឿង ដើម្បីបម្រើ​សេវា​ដឹកជ​ញ្ជូន​សាធារណៈឥតគិតថ្លៃ (មិនអស់ប្រាក់) ទៅតាមបណ្តាខេត្តនានា និងពីបណ្តាខេត្តនានា មក​រា​ជធានភ្នំពេញវិញ ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ក្នុងគោលបំណងដើម្បីសម្រួល និង​សម្រាលបន្ទុករបស់ប្រជាពលរដ្ឋក្នុងការធ្វើដំណើរទៅកាន់ស្រុកកំណើតនៅទូទាំងប្រទេស។ សូមបញ្ជាក់ទៀតថា ភ្ជុំបិណ្ឌ គឺជាពិធីបុណ្យមួយ ក្នុងចំណោម​ពិធី​បុណ្យធំៗ​ដទៃ​ទៀតនៃ​ព្រះពុទ្ធ​សាសនា ដែលប្រជារាស្រ្តទូទាំងប្រទេស តែងតែប្រារព្ធ មិនដែលអាក់នោះខានឡើយ។ តាម​ទម្លាប់​ ជារៀងរាល់ឆ្នាំ នៅពេលដល់ថ្ងៃខែដែលត្រូវប្រារព្ធពិធីបុណ្យភ្ជុំបិណ្ឌ ប្រជាពលរដ្ឋ​រស់​នៅ​ទីជិត ទីឆ្ងាយ តែងតែធ្វើដំណើរទៅជួបជុំគ្នា ជាពិសេសជួបជុំក្រុមគ្រួសារ ឪពុកម្ដាយ ដើម្បីរៀបចំ​ម្ហូប​អាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់នៅវត្តអារាមនានា៕ អត្ថបទ៖ ឈិត បូរ៉ាវី