រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយកាលពីថ្ងៃចន្ទ ទី៣០ ខែកញ្ញា ថា ពិភពលោកកាន់តែមានសុវត្ថិភាពជាងមុន បន្ទាប់ពីអ៊ីស្រាអែល បានសម្លាប់ លោក Hassan Nasrallah ដោយចាត់ទុកមេបញ្ជាការក្រុមហេបូឡារូបនេះថាជា «ភេរវករដ៏ឃោរឃៅ» ខណៈទទូចថាផ្នែកការទូត គឺជាឱកាសដ៏ល្អបំផុតសម្រាប់តំបន់មជ្ឈិមបូព៌ា ឲ្យស្ថិតក្នុងស្ថិរភាព។

លោក Blinken បាននិយាយនៅក្នុងទីក្រុងវ៉ាស៊ីនតោន អំពីមេដឹកនាំក្រុមសកម្មប្រយុទ្ធនៅលីបង់គាំទ្រដោយអ៊ីរ៉ង់ ដែលត្រូវបានសម្លាប់ ថា «តំបន់ និងពិភពលោក កាន់តែមានសុវត្ថិភាព បើគ្មានមេដឹកនាំរូបនេះ»។

លោក Hassan Nasrallah គឺជាភេរវករដ៏ឃោរឃៅម្នាក់ ដែលមានជនរងគ្រោះជាច្រើនរួមមានទាំង ជនជាតិអាមេរិក ជនជាតិអ៊ីស្រាអែល ជនស៊ីវិលនៅលីបង់ ជនស៊ីវិលនៅក្នុងប្រទេសស៊ីរី និងជាច្រើននាក់ទៀត។ លោក បាននិយាយដូច្នេះនៅពេលបើកកិច្ចប្រជុំនៃបណ្តាប្រទេសនៅក្នុងក្រុមចម្រុះ ដែលប្រយុទ្ធប្រឆាំងក្រុមរដ្ឋឥស្លាម។

ក្នុងអំឡុងពេលដឹកនាំរបស់ក្រុមហេបូឡា ក្រុមនេះបានបង្កការភ័យខ្លាចដល់ប្រជាជននៅទូទាំងតំបន់ និងរារាំងប្រទេសលីបង់ពីការឈានឆ្ពោះទៅមុខពេញលេញក្នុងនាមជាប្រទេសមួយ។

លោក Blinken បាននិយាយថា ទោះបីជាថ្មីៗនេះ មានការកើនឡើងយ៉ាងខ្លាំងនៅក្នុងការប្រយុទ្ធគ្នារវាងអ៊ីស្រាអែល និងក្រុមហេសបូឡា ក្នុងប្រទេសលីបង់ក៏ដោយ សហរដ្ឋអាមេរិកនៅតែជឿជាក់ថាផ្នែកការទូត គឺជាមធ្យោបាយឆ្ពោះទៅមុខដ៏ល្អបំផុតសម្រាប់តំបន់។