យោធាសហរដ្ឋអាមេរិក កាលពីថ្ងៃចន្ទ (ទី៣០ ខែកញ្ញា) បានចេញផ្សាយវីដេអូនៃអ្វីដែលខ្លួនបាននិយាយថា ជាការបើកបរពត់ពែនគ្មានសុវត្ថិភាពរបស់យន្តហោះចម្បាំងរុស្ស៊ី នៅជិតរដ្ឋ Alaska ក្នុងអំឡុងពេលមានការស្ទាក់ចាប់ដោយយោធាសហរដ្ឋអាមេរិក កាលពីសប្តាហ៍មុន។

សហរដ្ឋអាមេរិកតែងតែអនុវត្តការស្ទាក់ចាប់តាមអាកាស ចំពោះយន្តហោះរុស្ស៊ី នៅក្នុងដែនអាកាសអន្តរជាតិក្បែររដ្ឋ Alaska ហើយជាធម្មតានិយាយថា យន្តហោះទាំងនោះ ត្រូវបានអនុវត្តដោយសុវត្ថិភាព និងវិជ្ជាជីវៈ។ ប៉ុន្តែមន្ត្រីជំនាញ និយាយថា លើកនេះខុសពីមុន។

នៅក្នុងសេចក្តីថ្លែងការណ៍ ដែលត្រូវបានបង្ហោះនៅលើបណ្ដាញសង្គម X កងកម្លាំងទ័ពអាកាស លោកឧត្តមសេនីយ៍ Gregory Guillot ដែលមើលការខុសត្រូវលើកងកម្លាំងអាមេរិក នៅអាមេរិកខាងជើង បានឲ្យដឹងថា៖ «សកម្មភាពរបស់យន្តហោះ Su-35 របស់រុស្ស៊ី គឺគ្មានសុវត្ថិភាព គ្មានវិជ្ជាជីវៈ និងបង្កគ្រោះថ្នាក់ដល់ទាំងអស់គ្នា ដោយនេះមិនមែនជាអ្វី ដែលអ្នកបានឃើញនៅក្នុងកងកម្លាំងអាកាសអាជីពនោះទេ»។

ស្ថានទូតរុស្ស៊ីប្រចាំនៅទីក្រុងវ៉ាស៊ីនតោន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ កាលពីថ្ងៃទី២៣ ខែកញ្ញា ទីបញ្ជាការការពារដែនអាកាសអាមេរិកខាងជើង ដែលត្រូវបានគេស្គាល់ថា NORAD បាននិយាយថា ខ្លួនបានរកឃើញ និងតាមដានយន្តហោះយោធារុស្ស៊ីចំនួន ៤គ្រឿងដែលកំពុងប្រតិបត្តិការ នៅក្នុងតំបន់កំណត់អត្តសញ្ញាណការពារដែនអាកាសរដ្ឋ Alaska៕