ប្រធានាធិបតីទួរគី លោក Tayyip Erdogan បាននិយាយកាលពីថ្ងៃចន្ទ ទី៣០ ខែកញ្ញា ថា មហា​សន្និបាត​អង្គការសហប្រជាជាតិ គួរតែណែនាំឱ្យប្រើប្រាស់កម្លាំង ស្របតាមសេចក្តី​សម្រេច​ដែល​បាន​អនុម័ត​កាលពីឆ្នាំ១៩៥០ ប្រសិនបើក្រុមប្រឹក្សាសន្តិសុខអង្គការសហប្រជាជាតិ បរាជ័យ​ក្នុង​ការ​បញ្ឈប់​ការវាយប្រហាររបស់អ៊ីស្រាអែលនៅតំបន់ហ្កាហ្សា និងនៅប្រទេសលីបង់។

ប្រទេសទួរគីដែលជាសមាជិកសម្ព័ន្ធយោធាណាតូ បានថ្កោល​ទោស​ការ​វាយ​ប្រហារ​ដ៏​បំផ្លាញ​រប​ស់​អ៊ីស្រាអែល​នៅតំបន់ហ្កាហ្សាប្រឆាំងក្រុមសកម្មប្រយុទ្ធហាម៉ាសប៉ាឡេស្ទីន និងបានថ្កោល​ទោស​ការ​វាយ​ប្រហារនាពេលថ្មីៗនេះ នៅក្នុងប្រទេសលីបង់ ដែលផ្តោតលើ​ក្រុម​សកម្ម​ប្រយុទ្ធ​ហេសបូឡា។ ប្រទេសនេះ បានបញ្ឈប់រាល់ពាណិជ្ជកម្មជាមួយអ៊ីស្រាអែល និងបានដាក់​ពាក្យ​ចូលរួម​ក្នុង​សំណុំរឿងប្រល័យពូជសាសន៍ប្រឆាំងអ៊ីស្រាអែលនៅតុលាការពិភពលោក ដែល​អ៊ីស្រាអែល បានច្រានចោល។

លោក Erdogan បាននិយាយបន្ទាប់ពីកិច្ចប្រជុំគណៈរដ្ឋមន្ត្រីនៅទីក្រុងអង់ការ៉ា ថា មហា​សន្និបាត​អង្គការសហប្រជាជាតិ គួរតែអនុវត្តឲ្យបានឆាប់រហ័សនូវសិទ្ធិអំណាចក្នុងការណែនាំអំពីការប្រើប្រាស់កម្លាំង ដូចដែលខ្លួនបានធ្វើជាមួយនឹងសេចក្តីសម្រេចនៃការរួបរួមដើម្បីសន្តិភាពឆ្នាំ១៩៥០ ។

ក្រុមប្រឹក្សាសន្តិសុខ គឺជាស្ថាប័នតែមួយគត់របស់អង្គការសហប្រជាជាតិ ដែលជាធម្មតាអាចធ្វើសេចក្តីសម្រេចដែលមានកាតព្វកិច្ចស្របច្បាប់ ដូចជាការអនុញ្ញាតឱ្យប្រើប្រាស់កម្លាំង និងការដាក់ទណ្ឌកម្មជាដើម។

លោក Erdogan បាននិយាយថា លោកមានការសោកស្ដាយដែលឃើញបណ្តាប្រទេសមូស្លីមបរាជ័យក្នុងការប្រកាន់ជំហរសកម្មបន្ថែមទទៀតប្រឆាំងអ៊ីស្រាអែល ដោយជំរុញឱ្យពួកគេមានចំណាត់ការសេដ្ឋកិច្ច ការទូត និងនយោបាយ ប្រឆាំងអ៊ីស្រាអែល ដើម្បីដាក់សម្ពាធឱ្យប្រទេសនេះ ទទួលយកបទឈប់បាញ់។