ប្រធានាធិបតីប្រទេសបូលីវី លោក លូអ៊ីស អាស(Luis Arce) បានប្រកាស​ជាផ្លូវការ​នូវ​គ្រោះ​មហន្តរាយ​ជាតិ កាលពីថ្ងៃចន្ទ ដោយសារចំហេះព្រៃដ៏ខ្លាំងធ្វើឲ្យប៉ះពាល់​ដល់ភាគ​ខាង​កើត​ប្រទេស​បូលីវី។

វិធានការនេះ កើតឡើងបន្ទាប់ពីមានការស្នើសុំជាច្រើនសប្តាហ៍ពីអាជ្ញាធរតំបន់ អង្គការ និង​ប្រជាជន ដែលទាមទារឱ្យមានការអន្តរាគមន៍ទាំងបង្ខំបន្ថែមទៀត ដើម្បីប្រឈមនឹងវិបត្តិបរិស្ថាន ដែល​បាន បំផ្លាញព្រៃឈើជាង៧លានហិកតារួចហើយ នៅក្នុងតំបន់ Santa Cruz តែមួយ។

ក្នុង​អំឡុងពេលកិច្ចប្រជុំជាមួយអភិបាលបណ្ដោះអាសន្ន តំបន់ Santa Cruz លោក Mario Aguilera និងមន្ត្រីតំបន់ និងក្រុងផ្សេងទៀត លោកArce បានចុះហត្ថលេខាលើក្រឹត្យមួយ ជា​ការ​ប្រកាស​ផ្លូវការនូវគ្រោះមហន្តរាយ។

អ្នកសម្របសម្រួលនៃគណៈកម្មាធិការប្រតិបត្តិការសង្គ្រោះបន្ទាន់ បានរាយការណ៍ថា ចំហេះព្រៃ​បាន​ឆេះ​បំផ្លាញនៅក្នុងប្រទេសបូលីវី ចាប់តាំងពីខែមិថុនា ជាការបំផ្លាញ​មិន​ធ្លាប់​មាន​ពី​មុន​មក​នៅ​ក្នុង​តំបន់ Santa Cruz ដែលជាក្បាលម៉ាស៊ីនសេដ្ឋកិច្ចរបស់ប្រទេសបូលីវី។

អាជ្ញាធរ បានបញ្ជាក់ថា ផ្ទៃដីសរុបបច្ចុប្បន្នជាង៧លានហិកតា ត្រូវបាន​ឆេះបំផ្លាញ​លើស​ពី​ការ​ខូច​ខាត​ដែលបង្កឡើងដោយចំហេះព្រៃឆ្នាំ២០១៩ ដែលធ្វើឲ្យប៉ះពាល់ដល់ផ្ទៃដី៥,៣ លានហិកតា នៅទូទាំងប្រទេស៕