ថៃ៖ ក្រុមអាជ្ញាធរបានប្រញាប់ប្រញាល់ជួសជុលទំនប់ទឹក និងទ្វារទឹកដែលរងការខូចខាតដោយសារកម្លាំងទឹកហូរបុកខ្លាំង នៃអាងស្តុកទឹកមួយនៅភាគឦសានប្រទេសថៃដែលបណ្តាលឱ្យទឹកជំនន់ប៉ះពាល់ដល់លំនៅឋានជិត ៤.០០០ខ្នង និងតំបន់កសិដ្ឋានជាច្រើនកន្លែងទៀត។
អាងស្តុកទឹក Lam Chiang Krai នៅខេត្តនគររាជសីម៉ាមានកម្រិតទឹក ៥០% លើសសមត្ថភាពអតិបរមានៅពេលដែលផ្នែកតូចរបស់ទំនប់ទឹកនេះ ត្រូវបានបំផ្លាញដោយកំណើនទឹកជំនន់ដែលបណ្តាលមកពីភ្លៀងធ្លាក់ខ្លាំងបង្កឡើងដោយព្យុះត្រូពិក Diammu ដែលគេហៅថា Tianmu ដែលបានបោកបក់កាលពីចុងសប្តាហ៍។ លោក Kitikul Sepasiraporn ប្រធានមន្ទីរធារាសាស្ត្រខេត្តនគររាជសីមាសង្ឃឹមថា ការជួសជុលអាចនឹងបញ្ចប់ក្នុងរយៈពេលមួយសប្តាហ៍ ដែលអនុញ្ញាតឱ្យអាជ្ញាធរគ្រប់គ្រងការបញ្ចេញទឹកចូលក្នុងទំនប់ទឹក។ ក្រុមជួយសង្គ្រោះបន្តធ្វើការជម្លៀសប្រជាពលរដ្ឋដែលនៅក្បែរនោះ ព្រោះបារម្ភថាអាចមានការខូចខាតបន្ថែមទៀតដល់ទំនប់អាងស្តុកទឹក។
ក្រុមមន្ត្រីក៏បានចេញការព្រមានថ្មីៗ អំពីការកើនឡើងកម្ពស់ទឹកនៅក្នុងខេត្តចំនួន ៦បន្ថែមទៀតរួមទាំងទីក្រុងបាងកកផងដែរ បន្ទាប់ពីមនុស្សយ៉ាងហោចណាស់ ៧នាក់បានស្លាប់នៅក្នុងគ្រោះទឹកជំនន់ដែលបង្កឡើងដោយព្យុះនេះ។ ក្រសួងទប់ស្កាត់ និងសម្រាលគ្រោះមហន្តរាយបាននិយាយថា មនុស្សម្នាក់ត្រូវបានរាយការណ៍ថាបានបាត់ខ្លួនផងដែរ ហើយមនុស្សសរុបចំនួន ១៩៧.៧៩៥គ្រួសារនៅក្នុងខេត្តចំនួន ៣០ ដែលភាគច្រើននៅខាងភាគឦសាន និងភាគកណ្តាលបានរងផលប៉ះពាល់ដោយសារទឹកជំនន់នេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
