ទីភ្នាក់ងារសារព័ត៌មានរដ្ឋ KCNA នៅថ្ងៃចន្ទ (ទី១ ខែតុលា) នេះ បានរាយការណ៍ថា ក្រសួងការពារជាតិកូរ៉េខាងជើង បានរិះគន់ការដាក់ពង្រាយយុទ្ធោបករណ៍យុទ្ធសាស្ត្រនុយក្លេអ៊ែររបស់សហរដ្ឋអាមេរិក នៅក្នុងប្រទេសកូរ៉េខាងត្បូង ខណៈដែលទីក្រុងសេអ៊ូល កំពុងរៀបចំសម្រាប់ព្យុហយាត្រាយោធាដ៏កម្រមួយ ដើម្បីប្រារព្ធទិវាកងកម្លាំងប្រដាប់អាវុធ។

អនុរដ្ឋមន្ត្រីក្រសួងការពារជាតិកូរ៉េខាងជើង លោក Kim Kang Il (គីម កាំង អ៊ីល) បានចោទប្រកាន់ក្រុងវ៉ាស៊ីនតោនថា កំពុងបង្ហាញ «ការសម្លុតខាងយោធាដោយឥតប្រុងប្រយ័ត្ន» និងបង្កឲ្យមានភាពតានតឹង ដោយការបញ្ជូននាវាមុជទឹកដើរដោយថាមពលនុយក្លេអ៊ែរទៅកាន់កូរ៉េខាងត្បូង នាពេលថ្មីៗនេះ ហើយនិងបានហោះហើរយន្តហោះទម្លាក់គ្រាប់បែក B-1B ដើម្បីចូលរួមក្បួនព្យុហយាត្រាដែលបានគ្រោងទុក។

ប្រព័ន្ធផ្សព្វផ្សាយកូរ៉េខាងត្បូង បានរាយការណ៍ថា យន្តហោះទម្លាក់គ្រាប់បែក B-1B នឹងចូលរួមក្បួនព្យុហយាត្រា នៅរសៀលថ្ងៃទី១ ខែតុលា ដោយហោះហើរពីលើទីក្រុងសេអ៊ូល រួមជាមួយនឹងយន្តហោះចម្បាំងសម្ព័ន្ធមិត្ត និងយន្តហោះដទៃទៀត។

យោធាកូរ៉េខាងត្បូង និងកងកម្លាំងអាមេរិក នៅកូរ៉េ មិនបានបញ្ជាក់ពីការចូលរួមរបស់យន្តហោះទម្លាក់គ្រាប់បែកនោះទេ ប៉ុន្តែក្រសួងការពារជាតិរបស់ទីក្រុងសេអ៊ូល បានឲ្យដឹងថា ព្យុហយាត្រានេះមានគោលបំណងមួយផ្នែក ដើម្បីបង្ហាញពីកម្លាំងយោធារបស់ខ្លួន ដែលជាការរារាំងដល់កូរ៉េខាងជើង៕