មនុស្សយ៉ាងហោចណាស់ ៣នាក់ បានបាត់បង់ជីវិត ហើយ ១៥នាក់ផ្សេងទៀត បានរងរបួស នៅ​ក្នុង​ការ​វាយប្រហារ ដោយចាក់នឹងកាំបិត នៅផ្សារទំនើបមួយ ក្នុងទីក្រុងសៀងហៃ កាលពីថ្ងៃចន្ទ (ទី៣០ ខែកញ្ញា) ដោយហេតុការណ៍នេះ កើតមានឡើងនៅមុនថ្ងៃបុណ្យជាតិរយៈពេល ១​សប្តាហ៍​របស់​ប្រទេសចិន និងជាឧបទ្ទវហេតុចុងក្រោយនៃការចាក់ប្រហារជាបន្តបន្ទាប់ នៅ​ទីក្រុង​ធំៗ​របស់ចិន ក្នុងឆ្នាំ២០២៤។

ជនរងគ្រោះត្រូវបានបញ្ជូនទៅកាន់មន្ទីរពេទ្យភ្លាមៗ ដើម្បីព្យាបាលរបួស ប៉ុន្តែជាអកុសល មនុស្ស ៣នាក់ មិនអាចសង្គ្រោះជីវិត។ ចំណែក ១៥នាក់ទៀត មិនមានរបួសដល់អាយុជីវិតនោះឡើយ ។

ជនដៃ​ដល់មាននាមត្រកូល Lin វ័យ ៣៧ឆ្នាំ ត្រូវបាននគរបាលចាប់ខ្លួន បន្ទាប់ពីទទួល​បាន​សេចក្ដី​រាយ​ការណ៍ពីហេតុការណ៍នេះ នៅវេលាម៉ោង ៩ និង៤៧នាទីយប់ថ្ងៃទី៣០ ខែកញ្ញា។ នគរបាល​បាននិយាយថា បុរសរូបនេះ បានបង្កអំពើហិង្សា ដោយសារផ្ទុះកំហឹង ពាក់ព័ន្ធនឹង «ជម្លោះ​ហិរញ្ញវត្ថុផ្ទាល់ខ្លួន»។

ការវាយប្រហារដោយកាំបិតនេះ បានកើតឡើង ១ថ្ងៃមុនការចាប់ផ្ដើមនៃថ្ងៃបុណ្យជាតិ «Golden Week» របស់ប្រទេសចិន នៅពេលដែលការធ្វើដំណើរវិស្សមកាល ត្រូវបានគេរំពឹងថា នឹងមាន​កម្រិត​ខ្ពស់។ តែអ្វីដែលសំខាន់នោះ គឺថា ហេតុការណ៍ចាក់សម្លាប់ជាសាធារណៈ បានកើនឡើង ក្នុង​រយៈពេលប៉ុន្មានឆ្នាំមកនេះ ក្នុងប្រទេសចិន ដោយអាជ្ញាធរតែងលើកឡើងថា ដោយ​សារ​ជំងឺ​ផ្លូវ​ចិត្ត​។ ហើយកុមារៗ នៅសាលារៀន គឺជាគោលដៅទូទៅ៕