លោក Shigeru Ishiba ត្រូវបានសភាបោះឆ្នោតជ្រើសរើសជានាយករដ្ឋមន្ត្រីជប៉ុនជាផ្លូវការ នៅថ្ងៃអង្គារ (ទី១ តុលា) បន្ទាប់ពីរូបលោកឈ្នះនៅ​ក្នុងការ​ប្រកួត​ប្រជែង​ដ៏​ស្វិតស្វាញ​ដណ្ដើម​តំណែង​អ្នកដឹកនាំគណបក្សប្រជាធិបតេយ្យសេរី (LDP) ដែលកំពុងកាន់អំណាច។

សមាជិកគណៈរដ្ឋមន្ត្រីថ្មីក្រោមការដឹកនាំរបស់លោក Ishiba ដែលស្នងតំណែងពីលោក Fumio Kishida នឹងត្រូវបង្ហាញនៅយប់ថ្ងៃនេះ ខណៈដែល​រូបលោក​ព្យាយាម​ផ្សះផ្សាកា​រ​បែក​បាក់​របស់បក្ស និងរៀបចំសម្រាប់ការបោះឆ្នោត នៅថ្ងៃទី២៧ ខែតុលា។

យ៉ាងណាក្ដី អំឡុងពេលបោះឆ្នោត នៅរដ្ឋសភានោះដែរ សមាជិកសភាស្ត្រី​ម្នាក់​មក​ពី​គណបក្ស​នយោបាយ​ជឿនលឿន និងឆ្វេងនិយម ក្នុងប្រទេសជប៉ុន បានលើកបដាតវ៉ា​នឹង​ការ​រំលាយ​សភា​ជាន់​ទាប មុនពេលស្ត្រីរូបនោះត្រូវបានសន្តិសុខនាំខ្លួនចេញ។

បន្ទាប់ពីបរាជ័យក្នុងកិច្ចប្រឹងប្រែង ៤លើកកន្លងមក ដើម្បីបានក្លាយជាអ្នកដឹកនាំ លោក Ishiba អតីតរដ្ឋមន្ត្រីការពារជាតិវ័យ ៦៧ឆ្នាំ ដែលត្រូវបានគេមើលឃើញថា ជាអ្នកក្រៅនៅក្នុងរង្វង់គណបក្សរបស់លោក បានចាប់ផ្តើមជ្រើសរើសរួចហើយនូវមន្ត្រីរដ្ឋាភិបាល និងគណបក្ស ដែលនឹងចូលរួមជាមួយលោក ក្នុងការប្រកួតប្រជែងការបោះឆ្នោតសកល នាពេលខាងមុខ៕