កម្មករនាវា នៅឆ្នេរខាងកើត និងឈូងសមុទ្ររបស់សហរដ្ឋអាមេរិក ត្រូវបានគេរំពឹងថា នឹងធ្វើកូដកម្មនៅថ្ងៃអង្គារ (ទី១ ខែតុលា) នេះ បន្ទាប់ពីថ្ងៃកំណត់ពាក់កណ្តាលអធ្រាត្រ បានកន្លងផុតទៅដោយគ្មានសញ្ញាពីការមានកិច្ចព្រមព្រៀងកិច្ចសន្យាថ្មីជាមួយម្ចាស់កំពង់ផែ។ កូដកម្មត្រូវបានគេព្យាករថា នឹងបញ្ឈប់ការដឹកជញ្ជូនតាមសមុទ្រប្រហែលពាក់កណ្តាលប្រទេស។

កូដកម្មនេះនឹងរារាំងអ្វីៗគ្រប់យ៉ាង រាប់ចាប់ពីអាហារ រហូតដល់ការដឹកជញ្ជូនរថយន្តឆ្លងកាត់កំពង់ផែរាប់សិប ពីរដ្ឋ Maine ទៅរដ្ឋតិចសាស់ ជាការរំខានដែលអ្នកវិភាគ បានព្រមានថា នឹងធ្វើឲ្យសេដ្ឋកិច្ចខាតបង់រាប់ពាន់លានដុល្លារ ក្នុងមួយថ្ងៃ គំរាមកំហែងការងារ និងបង្កអតិផរណា។

សហជីព International Longshoremen's Association (ILA) ដែលតំណាងឲ្យកម្មករកំពង់ផែចំនួន ៤៥.០០០នាក់ បាន និងកំពុងចរចាជាមួយក្រុមនិយោជកនៃសម្ព័ន្ធដែនសមុទ្រសហរដ្ឋអាមេរិក (USMX) ដើម្បីឲ្យមាននូវកិច្ចសន្យាថ្មីរយៈពេល ៦ឆ្នាំ នៅមុនការផុតកំណត់ នាពាក់កណ្តាលអធ្រាត្រថ្ងៃទី៣០ ខែកញ្ញា។

ប៉ុន្តែប្រធានសហជីព ILA លោក Harold Daggett បាននិយាយថា និយោជក ដូចជាប្រតិបត្តិករនាវាកុងតឺន័រ Maersk និងក្រុមហ៊ុន APM Terminals North America មិនបានផ្តល់ការដំឡើងប្រាក់ឈ្នួលសមរម្យ ឬយល់ព្រមតាមការទាមទារឲ្យបញ្ឈប់គម្រោងស្វ័យប្រវត្តិកម្មកំពង់ផែនោះទេ។ តែសម្ព័ន្ធ USMX បានឲ្យដឹងនៅក្នុងសេចក្តីថ្លែងការណ៍ កាលពីថ្ងៃចន្ទ (ទី៣០ ខែកញ្ញា) ថា ខ្លួនបានផ្តល់ការដំឡើងប្រាក់ឈ្នួលជិត ៥០ភាគរយ។

នៅក្នុងសេចក្តីថ្លែងការណ៍ កាលពីថ្ងៃអាទិត្យ (ទី២៩ ខែកញ្ញា) និងថ្ងៃចន្ទ (ទី៣០ ខែកញ្ញា) សហជីព ILA បានឲ្យដឹងថា ការធ្វើកូដកម្មកំពង់ផែ នឹងប្រព្រឹត្តទៅដោយចាប់ផ្តើម នៅថ្ងៃអង្គារនេះ វេលាម៉ោង ១២:០១នាទីព្រឹក (ម៉ោងក្នុងស្រុក)៕