ទីភ្នាក់ងារសារព័ត៌មានរដ្ឋចិន Xinhua នៅថ្ងៃអង្គារ (ទី១ ខែតុលា) នេះ បានរាយការណ៍ដោយដកស្រង់សម្តីពីបុគ្គលដែលដឹងអំពីបញ្ហានេះថា រដ្ឋមន្ត្រីក្រសួងពាណិជ្ជកម្មចិន លោក Wang Wentao និងសមភាគីអាមេរិក នឹងពិភាក្សាគ្នាតាមទូរសព្ទ នាពេលខាងមុខ ជុំវិញទំនាក់ទំនងពាណិជ្ជកម្ម និងសេដ្ឋកិច្ច។

សារព័ត៌មាន Xinhua បានឲ្យដឹងថា ឥស្សរជនជាន់ខ្ពស់ទាំង២ នឹងផ្លាស់ប្តូរទស្សនៈ ជុំវិញទំនាក់ទំនងសេដ្ឋកិច្ច និងពាណិជ្ជកម្មទ្វេភាគី ហើយនិងបញ្ហាសំខាន់ៗនៃកង្វល់រួមគ្នា ក្នុងរួមទាំងការរឹតបន្តឹងលើយានយន្តអគ្គិសនី (EV) ផងដែរ។

គួរបញ្ជាក់ថា អំឡុងកិច្ចប្រជុំក្រុមការងាររយៈពេល ២ថ្ងៃ នៅទីក្រុងប៉េកាំងកាលពីខែមុន ជាមួយគណៈប្រតិភូអាមេរិក មន្ត្រីចិនបានសម្តែងការព្រួយបារម្ភយ៉ាងខ្លាំង អំពីការដំឡើងពន្ធបន្ថែមរបស់សហរដ្ឋអាមេរិក ការរឹតបន្តឹងការវិនិយោគ និងការដាក់ទណ្ឌកម្ម ទាក់ទងនឹងរុស្ស៊ី។

ការដំឡើងពន្ធជុំថ្មីរបស់សហរដ្ឋអាមេរិក លើទំនិញរបស់ចិនតម្លៃ ១៨ពាន់លានដុល្លារ ក្នុងនោះរួមទាំងរថយន្ត EV អាគុយ EV និងបន្ទះសូឡាប្រើប្រាស់ថាមពលពន្លឺព្រះអាទិត្យ បានចូលជាធរមាន នៅចុងខែកញ្ញា ដោយអាគុយលីចូម-អ៊ីយ៉ុង រងផលប៉ះពាល់ខ្លាំងជាងគេ។ សហរដ្ឋអាមេរិកស្ទើរតែមិនមាននាំចូលរថយន្ត EV ពីចិននោះឡើយ។

រដ្ឋបាលរបស់លោក Joe Biden បាននិយាយថា ដំឡើងពន្ធគយមានគោលបំណងពង្រឹងការការពារឧស្សាហកម្មក្នុងស្រុកជាយុទ្ធសាស្ត្រ ដើម្បីទប់ទល់នឹងការផលិតលើសចំណុះដែលជំរុញដោយរដ្ឋរបស់ចិន។ ទីក្រុងប៉េកាំង បានប្តេជ្ញាសងសឹក៕