​កូរ៉េខាងជើង៖ ប្រព័ន្ធ​ផ្សព្វផ្សាយ​រដ្ឋ KCNA បាន​រាយការណ៍​នៅ​ថ្ងៃ​ព្រហស្បតិ៍​នេះ​ថា មេដឹកនាំ​កូរ៉េខាងជើង​លោក Kim Jong Un បាន​និយាយថា​ លោក​មាន​ឆន្ទៈ​ក្នុង​ការតភ្ជាប់​ឡើងវិញ​ នូវ​ខ្សែ​ទូរស័ព្ទ​ទាន់​ហេតុការណ៍​អន្តរ​កូរ៉េ​ដែល​បាន​កាត់ផ្ដាច់​នៅ​ខែក្រោយ ប៉ុន្តែ​បាន​ចោទប្រកាន់​សហរដ្ឋអាមេរិក​ពីបទ​ស្នើសុំ​កិច្ចពិភាក្សា​ដោយ​មិន​ផ្លាស់ប្តូរ​ “គោលនយោបាយ​អរិភាព​” ចំពោះ​ប្រទេស​របស់ខ្លួន​។

​នៅក្នុង​សុន្ទរកថា​របស់លោក​នៅ​ឯ​សភា​ប្រជាជន​កំពូល លោក Kim បាន​និយាយថា ការ​គំរាម​កំហែង​រប​ស់​យោធា​អាមេរិក និង​គោលនយោបាយ​អរិភាព​នៅ​តែ​មិន​ផ្លាស់ប្តូរ​ក្រោម​រដ្ឋបាល​ថ្មី​របស់​ប្រធានាធិបតីលោក Joe Biden​។​ រដ្ឋបាល​របស់លោក Biden បាន​និយាយថា​ ខ្លួន​បាន​ព្យាយាម​សម្របសម្រួល​ជាមួយ​ទីក្រុង​ព្យុងយ៉ាង ដើម្បី​បំបែក​ភាពជាប់គាំង​លើ​កិច្ចចរចា​រំសាយ​កម្មវិធី​នុយក្លេអ៊ែរ និង​មី​ស៊ី​ល​របស់ខ្លួន​ ជា​ថ្នូរ​នឹង​ការបន្ធូរបន្ថយ​ទណ្ឌកម្ម​របស់​សហរដ្ឋ​អាមេរិក​។​

ប៉ុន្តែ​មេដឹកនាំ​វ័យក្មេង​របស់​រដ្ឋ​ឯកា​មួយ​នេះ​បាន​និយាយថា​ ការផ្តល់ជូន​នូវ​ការព្រមព្រៀង និង​ការសន្ទនា​ឡើងវិញ គឺ​ត្រូវ​គ្របដណ្ដប់​លើ​គោលនយោបាយ​អរិភាព​ប្រកបដោយ​និរន្តរភាព​ប៉ុណ្ណោះ​។ ​ទីភ្នាក់ងារ​ព័ត៌មាន​ផ្លូវការ KCNA បាន​និយាយថា​ លោក Kim បានបង្ហាញ​ពី​ឆន្ទៈ​ក្នុង​ការតភ្ជាប់​ឡើងវិញ​នូវ​ខ្សែ​ទូរស័ព្ទ​បន្ទាន់​អន្តរ​កូរ៉េ​ចាប់ពី​ខែតុលា ​ដែលជា​ផ្នែក​មួយ​នៃ​កិច្ចខិតខំ​ប្រឹងប្រែង​ដើម្បី​បំពេញ​ក្តីសង្ឃឹម​របស់​ប្រជាជន​ ចំពោះ​ទំនាក់ទំនង​ល្អប្រសើរ​ និង​សន្តិភាព​យូរអង្វែង​រវាង​គូប្រជែង​៕

អត្ថបទ៖ សុខមាន