ប្រធានអង្គការណាតូ បាននិយាយកាលពីថ្ងៃអង្គារថា កូរ៉េខាងត្បូង និងដៃគូឥណ្ឌូប៉ាស៊ីហ្វិកបីផ្សេងទៀតនៃអង្គការសន្ធិសញ្ញាអាត្លង់ទិកខាងជើង (NATO) នឹងចូលរួមកិច្ចប្រជុំថ្នាក់រដ្ឋមន្ត្រីការពារជាតិ នាពេលខាងមុខ ជាលើកដំបូង នៅចុងខែនេះ។

អគ្គលេខាធិការអង្គការណាតូថ្មី លោក Mark Rutte បាននិយាយថា រដ្ឋមន្ត្រីការពារជាតិកូរ៉េខាងត្បូង ជប៉ុន អូស្ត្រាលី និងនូវែលសេឡង់ ដែលគេស្គាល់ថា ប្រទេសឥណ្ឌូ-ប៉ាស៊ីហ្វិកទាំង៤ (IP4) ត្រូវបានអញ្ជើញឲ្យចូលរួមក្នុងកិច្ចប្រជុំដែលគ្រោងធ្វើឡើង នៅថ្ងៃទី១៧-១៨ ខែតុលា នៅទីក្រុងប្រ៊ុចសែល។

លោក Rutte បាននិយាយនៅក្នុងសន្និសីទសារព័ត៌មានមួយនៅឯទីស្នាក់ការកណ្តាលរបស់អង្គការ NATO នៅទីក្រុងប្រ៊ុចសែលថា៖«ខ្ញុំទន្ទឹងរង់ចាំស្វាគមន៍ពួកគេ និងបង្កើតវិធីសាស្រ្តរួមគ្នាមួយចំពោះបញ្ហាប្រឈមរួមគ្នារបស់យើង»។

នេះនឹងជាលើកដំបូងដែលរដ្ឋមន្ត្រីការពារជាតិមកពី IP4 នឹងចូលរួមកិច្ចប្រជុំណាតូ ទោះបីជាមេដឹកនាំ និងរដ្ឋមន្ត្រីការបរទេសមកពីប្រទេសនានា បានចូលរួមកិច្ចប្រជុំរបស់អង្គការណាតូ ក្នុងរយៈពេលបីឆ្នាំកន្លងមកក៏ដោយ។