អ្នកស្រុករាប់ម៉ឺននាក់នៅរដ្ឋ ណស ខារ៉ូឡាញណា (North Carolina) នៅតែមិនមានទឹកប្រើប្រាស់កាលពីថ្ងៃពុធ (០២ តុលា) ប្រាំមួយថ្ងៃបន្ទាប់ពីព្យុះសង្ឃរា ហែលលេន (Helene) បានបោកបក់ចូលរដ្ឋ ហ្វ្លរីដា (Florida) និងបានបំផ្លិចបំផ្លាញតាមផ្លូវឆ្លងកាត់របស់ខ្លួននៅភាគអាគ្នេយ៍នៃសហរដ្ឋអាមេរិក ដោយបានសម្លាប់មនុស្សជាង ១៦០នាក់។

ព្យុះដ៏មានឥទ្ធិពលនេះបានបង្កការជន់លិចជាច្រើននៅភាគខាងលិចនៃរដ្ឋដោយទឹកជំនន់ដ៏មហន្តរាយ បំផ្លាញបំពង់ផ្គត់ផ្គង់ទឹក បំផ្លាញរោងចក្រទឹកស្អាត និងកាត់ផ្តាច់ចរន្តអគ្គិសនី។

មួយភាគប្រាំនៃអ្នកស្រុក ១លាននាក់នៅភាគខាងលិចនៃរដ្ឋ North Carolina មិនមានទឹកទាល់តែសោះ ឬសម្ពាធប្រព័ន្ធទាបកាលពីថ្ងៃពុធ នេះបើយោងតាមទិន្នន័យរបស់រដ្ឋតាមអ៊ីនធឺណិត។ យោងតាមគេហទំព័រតាមដានការដាច់ចរន្តអគ្គិសនី Poweroutage.us បានឱ្យដឹងថា លំនៅឋាន និងអាជីវកម្មប្រហែល ១,២លានទីតាំងនៅផ្នែកជាច្រើនទូទាំងរដ្ឋ នៅតែពុំមានអគ្គិសនីប្រើប្រាស់។

ព្យុះ Helene បានបោកបក់ដល់ច្រាំងសមុទ្រក្នុងរដ្ឋ Florida កាលពីល្ងាចថ្ងៃព្រហស្បតិ៍ សប្ដាហ៍មុន ជាព្យុះសង្ឃរាប្រភេទទី៤ ដ៏មានឥទ្ធិពល មុនពេលបង្វែរឥទ្ធិពលរបស់ខ្លួនទៅលើភាគអាគ្នេយ៍ ខណៈទឹកជំនន់ដ៏គហុកបានបំផ្លាញផ្ទះសម្បែង និងបង្ខំឱ្យមនុស្សជាចរើនត្រូវជម្លៀសខ្លួន៕