កោះតៃវ៉ាន់ នៅថ្ងៃព្រហស្បតិ៍ (០៣ តុលា) នេះបានបន្តទប់ទល់សម្រាប់ការមកដល់នៃព្យុះទីហ្វុង ក្រាថ្សន (Krathon) ដែលកំពុងតែចុះខ្សោយ ដោយបានសម្លាប់មនុស្សពីរនាក់រួចហើយមកទល់ពេលនេះ ខណៈកោះនេះបានបន្តបិទរយៈពេលពីរថ្ងៃ ជាមួយនឹងការផ្អាកជើងហោះហើររាប់រយជើង ហើយទីផ្សារហិរញ្ញវត្ថុបានបិទ។

ព្យុះ Krathon ត្រូវបានព្យាករថានឹងបោកបក់ដល់ដីនៅកណ្តាលថ្ងៃត្រង់នៅទីក្រុងកំពង់ផែ កាវសុង (Kaohsiung) ភាគនិរតីជាព្យុះទីហ្វុងប្រភេទ២ ដែលខ្សោយជាងមុន ប៉ុន្តែរដ្ឋាភិបាលបាននឹងកំពុងព្រមានពីភ្លៀងធ្លាក់ខ្លាំង និងឥទ្ធិពលព្យុះបោកបក់តាមបណ្តោយឆ្នេរ។

ភ្លាមៗបន្ទាប់ពីព្រឹកព្រលឹម អ្នកស្រុក កៅសុង ដែលជាទីក្រុងមានប្រជាជនប្រហែល ២,៧លាននាក់ បានទទួលសារព្រមានដោយប្រាប់ពួកគេឱ្យស្វែងរកទីជម្រកពីខ្យល់ព្យុះកម្លាំងខ្លាំងជាង ១៦០គីឡូម៉ែត្រក្នុងមួយម៉ោង។ ទីភ្នាក់ងារពន្លត់អគ្គិភ័យបានរាយការណ៍ថា មនុស្សពីរនាក់បានស្លាប់នៅពេលដែលព្យុះទីហ្វុងនេះខិតជិតកោះ ដោយបាននាំមកនូវភ្លៀងធ្លាក់យ៉ាងខ្លាំងពាសពេញកោះទាំងនៅលើភ្នំនិងឆ្នេរសមុទ្រភាគខាងកើតដែលមានប្រជាជនរស់នៅតិច។

ព្យុះទីហ្វុងនេះត្រូវបានព្យាករថានឹងផ្លាស់ទីបន្តិចម្តងៗឆ្ពោះទៅតំបន់ទំនាបភាគខាងលិចនៃកោះតៃវ៉ាន់ ហើយនឹងចុះខ្សោយបន្ថែមទៀតទៅជាព្យុះត្រូពិចនៅល្ងាចថ្ងៃសុក្រ (០៤ តុលា) ស្អែកនេះ។ ជើងហោះហើរក្នុងស្រុកទាំងអស់ត្រូវបានលុបចោលសម្រាប់ថ្ងៃទីពីរ ក៏ដូចជាជើងហោះហើរអន្តរជាតិរាប់រយជើងផងដែរ ខណៈទីផ្សារហិរញ្ញវត្ថុរបស់តៃវ៉ាន់ បានបន្តបិទសម្រាប់ថ្ងៃទីពីរ៕