អនុរដ្ឋមន្ត្រី លោក ស៊ូរ៉ាផុង ពីរ៉ាឆូត (Surapong Piyachote) បាននិយាយកាលពីថ្ងៃពុធ (០២ តុលា) ថា ក្រសួងដឹកជញ្ជូនថៃ បានផ្តល់ពេលពីរខែដល់នាយកដ្ឋានដឹកជញ្ជូនផ្លូវគោក (DLT) ដើម្បីត្រួតពិនិត្យរថយន្តក្រុងដឹកអ្នកដំណើរទាំងអស់បំពាក់ដោយស៊ីឡាំងឧស្ម័នធម្មជាតិដែលបានបង្ហាប់ (CNG) ដើម្បីធានាថាយានយន្តទាំងនោះឆ្លងកាត់ស្តង់ដារសុវត្ថិភាពអគ្គិភ័យ។

ថ្នាក់ដឹកនាំក្រសួងបានជួបប្រជុំគ្នាកាលពីថ្ងៃពុធ ដើម្បីពិភាក្សាអំពីវិធានការសុវត្ថិភាព បន្ទាប់ពីឧបទ្ទវហេតុដែលរថយន្តទេសចរណ៍ដើរដោយថាមពលហ្គាស បានឆាបឆេះពេលកំពុងដឹកសិស្សសាលានៅក្នុងខេត្ត ប៉ាធុម ថានី (Pathum Thani) កាលពីថ្ងៃអង្គារ ដែលបានសម្លាប់មនុស្ស ២៣នាក់។ 

ក្នុងចំណោមសិស្ស ៣៩នាក់ និងគ្រូ ៦នាក់ដែលជិះលើរថយន្តនោះ មានសិស្ស ២០នាក់ និងគ្រូ ៣នាក់បានស្លាប់ក្នុងគ្រោះអគ្គិភ័យ។ រថយន្តក្រុងនេះគឺជាមួយក្នុងចំណោមរថយន្តក្រុងទាំងបីដែលត្រូវបានជួលដោយសាលា វត្តកែវផាយ៉ា សាងក្រារាម (Wat Khao Phaya Sangkharam) ក្នុងខេត្ត ឧថៃ ថានី (Uthai Thani) ដើម្បីដឹកសិស្សបឋមសិក្សាក្មេងៗ និងគ្រូបង្រៀនក្នុងដំណើរកម្សាន្តទៅកាន់ក្រុងអយុធ្យា។

នាយកដ្ឋានដឹកជញ្ជូន DLT បានរាយការណ៍ថា រថយន្តក្រុងដឹកអ្នកដំណើរ ១៣.៤២៦គ្រឿង នៅប្រទេសថៃ ត្រូវបានចុះបញ្ជីថាប្រើប្រាស់ហ្គាស CNG ជាឥន្ធនៈ ដូចគ្នាទៅនឹងរថយន្តក្រុងដែលជួបរឿងអកុសលនោះ។ វិធានការចុះពិនិត្យនេះគឺដើម្បីឆ្លើយតបទៅនឹងការស៊ើបអង្កេតរបស់នគរបាលដែលបានរកឃើញថារថយន្តក្រុងក្នុងគ្រោះថ្នាក់នេះត្រូវបានចុះបញ្ជីជាលើកដំបូងនៅថ្ងៃទី១៩ ខែកុម្ភៈ ឆ្នាំ១៩៧០ ឬ ៥៤ឆ្នាំមុន។ វាត្រូវបានចុះបញ្ជីឡើងវិញនៅថ្ងៃទី២៦ ខែតុលា ឆ្នាំ២០១៨ ដោយសារតែការកែប្រែដែលបានធ្វើឡើងចំពោះស៊ុមតួរបស់រថយន្ត និងការផ្លាស់ប្តូរទំហំ ដែលមានន័យថាមិនត្រូវតាមស្តង់ដារ៕