កប៉ាល់ដឹកទូកុងតឺន័រជាច្រើនបានតម្រង់ជួរយ៉ាងកកស្ទះនៅខាងក្រៅកំពង់ផែសំខាន់ៗរបស់សហរដ្ឋអាមេរិក នៅថ្ងៃព្រហស្បតិ៍ (០៣ តុលា) នេះ ខណៈការតវ៉ារបស់កម្មករនាវាដ៏ធំបំផុតក្នុងរយៈពេលជិតកន្លះសតវត្សរ៍មកនេះ បានឈានចូលថ្ងៃទី៣ របស់ខ្លួន ដែលរារាំងការទម្លាក់ទំនិញ និងគំរាមកំហែងដល់កង្វះខាតការផ្គត់ផ្គង់ រាប់ចាប់ពីផ្លែចេក រហូតដល់គ្រឿងបន្លាស់រថយន្ត។

ពុំមានការចរចាណាមួយត្រូវបានកំណត់ពេលរវាងសមាគមកម្មករកំពង់ផែអន្តរជាតិ ឡងស្ហ័រមែន (Longshoremen) ឬហៅថា ILA និងនិយោជកទេ ប៉ុន្តែបណ្ដាម្ចាស់កំពង់ផែដែលស្ថិតក្រោមសម្ពាធពីសេតវិមានឱ្យដំឡើងប្រាក់ឈ្នួលរបស់កម្មការដើម្បីចុះកិច្ចព្រមព្រៀងមួយនោះ បានផ្តល់សញ្ញាកាលពីល្ងាចថ្ងៃពុធថា ពួកគេបើកចំហចំពោះកិច្ចពិភាក្សាថ្មី។

យ៉ាងហោចណាស់មានកប៉ាល់ដឹកទូកុងតឺន័រចំនួន ៤៥គ្រឿងដែលមិនអាចទម្លាក់ទំនិញ បានបោះយុថ្កាចតនៅខាងក្រៅកំពង់ផែឆ្នេរភាគខាងកើត (East Coast) និងឆ្នេរឈូងសមុទ្រ (Gulf Coast) ដែលរងការតវ៉ាកាលពីថ្ងៃពុធ ពោលគឺកើនឡើងពីចំនួន ៣ដង មុនពេលកុដកម្មចាប់ផ្តើមកាលពីថ្ងៃអាទិត្យ នេះបើយោងតាមទីភ្នាក់ងារតាមដានសង្វាក់ផ្គត់ផ្គង់ អេវើស្រ្ទីម អាន់ណាលីធីកស៍ (Everstream Analytics)។

ជម្រើសមួយដើម្បីបញ្ចៀសការកកស្ទះនេះគឺការធ្វើដំណើរទៅកាន់កំពង់ផែឆ្នេរភាគខាងលិច (West Coast) នៅផ្នែកម្ខាងទៀតនៃប្រទេស ដោយទំនងជាប្រើប្រាស់ព្រែកជីកប៉ាណាម៉ា ហើយជាការធ្វើដំណើររាប់ពាន់គីឡូម៉ែត្រ ដែលនឹងបង្កើនថ្លៃដើម និងបន្ថែមពេលជាច្រើនសប្តាហ៍នៃការដឹកជញ្ជូន។ 

សហជីព ILA បានចាប់ផ្តើមកូដកម្មរបស់ខ្លួនដោយកម្មករកំពង់ផែចំនួន ៤៥.០០០នាក់ពីរដ្ឋ ម៉េន (Maine) ទៅកាន់រដ្ឋតិចសាស់ (Texas) ដែលជាការបញ្ឈប់ដ៏សំខាន់លើកដំបូងចាប់តាំងពីឆ្នាំ១៩៧៧មក កាលពីថ្ងៃអង្គារ បន្ទាប់ពីកិច្ចពិភាក្សាការងាររយៈពេល ៦ឆ្នាំថ្មីជាមួយក្រុមនិយោជកនៃសម្ព័ន្ធផ្លូវទឹក (USMX) របស់អាមេរិក បានបែកបាក់៕