ក្រុមមន្ត្រីក្នុងតំបន់បាននិយាយកាលពីល្ងាចថ្ងៃពុធ (០២ តុលា) ថា យ៉ាងហោចណាស់មនុស្ស ៦០នាក់បានស្លាប់ បន្ទាប់ពីទូកមួយគ្រឿងដែលដឹកស្ត្រី និងកុមារភាគច្រើនត្រឡប់មកពីពិធីបុណ្យសាសនាមួយនៅរដ្ឋនីហ៊្សេ (Niger) ភាគខាងជើងប្រទេសនីហ៊្សេរីយ៉ា បានក្រឡាប់លិច។

លោក ជីប្រីល អាបឌុលឡាហ៊ី មូរ៉េហ្គី (Jibril Abdullahi Muregi) ប្រធានរដ្ឋាភិបាលក្នុងតំបន់ ម៉ូក្វា (Mokwa) បាននិយាយថា មនុស្សប្រហែល ១៦០នាក់ឥឡូវនេះត្រូវបានជួយសង្គ្រោះ បន្ទាប់ពីទូកឈើដែលដឹកអ្នកដំណើរជិត ៣០០នាក់ បានលិចកាលពីយប់ថ្ងៃអង្គារ នៅលើទន្លេនីហ៊្សេ ជុំវិញសហគមន៍ ក្បាជីបូ (Gbajibo)។

នេះជាគ្រោះមហន្តរាយដ៏ធំទីពីរហើយក្នុងរដ្ឋនីហ៊្សេ ក្នុងរយៈពេល ១៨ខែ បន្ទាប់ពីមនុស្សជាង ១០០នាក់ បានស្លាប់ក្នុងឧបទ្ទវហេតុទូកមួយផ្សេងទៀត។ 

គ្រោះថ្នាក់តាមទូកគឺជារឿងធម្មតានៅក្នុងប្រទេសនីហ៊្សេរីយ៉ា ជាពិសេសនៅទន្លេនីហ៊្សេ ដោយមូលហេតុរួមមានការផ្ទុកលើសទម្ងន់ ស្ថានភាពមិនល្អនៃទូកភាគច្រើន និងកម្ទេចកម្ទីនៅក្រោមទឹកដែលទូកតែងតែបុកបណ្ដាលឱ្យលិចធ្លាយ៕