ក្រុមធ្វើជំរឿនអមដោយនគរបាល និងទាហានបានដើរតាមផ្លូវទូទាំងសហភាពមីយ៉ាន់ម៉ា កាលពីថ្ងៃពុធ (០២ តុលា) សម្រាប់ការស្ទង់មតិថ្នាក់ជាតិមួយ ដែលក្រុមប្រឆាំងរដ្ឋាភិបាលបានជំរុញប្រជាជនឱ្យធ្វើពហិការ។ របបយោធាដែលកំពុងកាន់អំណាច កំពុងបន្តទៅមុខជាមួយនឹងជំរឿន ទោះបីជាខ្លួនបានបាត់បង់ការគ្រប់គ្រងលើតំបន់ធំៗនៃប្រទេសទៅឱ្យក្រុមប្រដាប់អាវុធដែលប្រឆាំងនឹងការគ្រប់គ្រងរបស់យោធាក៏ដោយ។

ជម្លោះដ៏បង្ហូរឈាមបានរាលដាលពាសពេញប្រទេសមីយ៉ាន់ម៉ា ប៉ុន្តែរបបយោធានិយាយថា ការស្ទង់មតិគឺចាំបាច់ដើម្បីធ្វើបច្ចុប្បន្នភាពបញ្ជីឈ្មោះអ្នកបោះឆ្នោតមុនការបោះឆ្នោតដែលបានសន្យានៅឆ្នាំ២០២៥។ ក្រុមអ្នកធ្វើជំរឿនដែលអមដោយទាហាន និងនគរបាលប្រដាប់អាវុធ ក៏បានចុះទៅក្រុងយ៉ាំងហ្គោន (Yangon) ដើម្បីបំពេញការស្ទង់មតិ ៦៨សំណួរ។

ជំរឿននេះកើតឡើងនៅពេលដែលរបបយោធាដឹកនាំដោយឧត្តមសេនីយ មីន អ៊ុងលាំង (Min Aung Hlaing) ចាញ់ប្រៀបក្នុងសមរភូមិទល់នឹងក្រុមប្រដាប់អាវុធជនជាតិភាគតិច និងក្រុមគាំទ្រលទ្ធិប្រជាធិបតេយ្យ ហៅថា “កងកម្លាំងការពារប្រជាជន” (PDF) ដែលក្រោកឡើងដើម្បីប្រឆាំងនឹងរដ្ឋប្រហាររបស់យោធានៅឆ្នាំ២០២១។

ការស្ទង់មតិនេះរួមបញ្ចូលទាំងសំណួរអំពីសមាជិកគ្រួសារដែលរស់នៅឆ្ងាយពីផ្ទះសម្បែង ដែលអ្នករិះគន់និយាយថានេះជាមធ្យោបាយមួយក្នុងការឱ្យរបបយោធាកំណត់ថាអ្នកណាដែលបានចូលរួមជាមួយក្រុមប្រដាប់អាវុធ ឬបានភៀសខ្លួនចេញពីប្រទេសដើម្បីជៀសវាងការចុះឈ្មោះចូលក្នុងជួរកងទ័ព។ ជំរឿននោះក៏រួមបញ្ចូលសំណួរអំពីជនជាតិរបស់ម្ចាស់ផ្ទះ និងភាសាដែលពួកគេនិយាយនៅផ្ទះផងដែរ៕