មនុស្សរាប់ពាន់នាក់នៅទីក្រុងប៊ែរឡាំង កាលពីថ្ងៃព្រហស្បតិ៍ ទី៣ ខែតុលា បានធ្វើបាតុកម្មប្រឆាំង ការគាំទ្រផ្នែកយោធារបស់ប្រទេសអាល្លឺម៉ង់សម្រាប់អ៊ុយក្រែន ខណៈប្រទេសនេះប្រយុទ្ធដើម្បីទប់ទល់ការឈ្លានពានរបស់កងទ័ពរុស្ស៊ី។

អ្នកចូលរួម បានឆ្លើយតបទៅនឹងការអំពាវនាវរបស់ក្រុមសមូហភាពឆ្វេងនិយមជ្រុល ដើម្បីប្រមូលផ្តុំគ្នានៅក្នុងរដ្ឋធានីប្រទេសអាល្លឺម៉ង់ និងបានកាន់ស្លាកដែលមានអំណានថា «ការចរចា! គ្មានអាវុធ!» «ទេចំពោះសង្រ្គាម» និង »សន្តិភាពនិយម មិនឆោតល្ងង់នោះទេ» ហើយអ្នកមួយចំនួនទៀត កាន់ស្លាកប្រឆាំងអាមេរិក។

ការទាមទារដ៏សំខាន់មួយរបស់ពួកគេ គឺសម្រាប់ប្រទេសអាល្លឺម៉ង់ ឱ្យបញ្ឈប់ការបញ្ជូនអាវុធទៅឲ្យប្រទេសអ៊ុយក្រែន ដែលទីក្រុងគីវ ត្រូវការយ៉ាងខ្លាំងដើម្បីការពារខ្លួនពីការឈ្លានពានរបស់រុស្ស៊ី។

ប្រទេសអាល្លឺម៉ង់ នឹងអនុម័តថវិកាចំនួន ៣៩៧លានអឺរ៉ូក្នុងជំនួយយោធាសម្រាប់អ៊ុយក្រែនបន្ថែមទៀត។ ការតវ៉ា បានកើតឡើងមួយសប្តាហ៍មុនដំណើរទស្សនកិច្ចផ្លូវរដ្ឋជាលើកដំបូងរបស់ប្រធានាធិបតីសហរដ្ឋអាមេរិក ទៅកាន់ប្រទេសអឺរ៉ុបមួយនេះ ចាប់តាំងពីលោក Ronald Reagan ក្នុងឆ្នាំ១៩៨៥។

លោក Joe Biden ត្រូវបានគេរំពឹងថានឹងជួបជាមួយសម្ព័ន្ធមិត្តរបស់អ៊ុយក្រែន ដើម្បីពិភាក្សាអំពីការគាំទ្រផ្នែកយោធាដល់ប្រទេសដែលហែកហួរដោយសង្រ្គាមនៅឯមូលដ្ឋានកងទ័ពអាមេរិក Ramstein ភាគខាងលិចប្រទេសអាល្លឺម៉ង់។

មេដឹកនាំឆ្វេងនិយមជ្រុល លោក Sahra Wagenknecht ដែលបានចូលរួមការតវ៉ានៅទីក្រុងប៊ែរឡាំង បានអំពាវនាវជាយូរមកហើយឱ្យបញ្ចប់ការដឹកជញ្ជូនសព្វាវុធទៅកាន់ទីក្រុងគីវ និងប្រឆាំងផែនការដាក់ពង្រាយមីស៊ីលរយៈចម្ងាយឆ្ងាយរបស់សហរដ្ឋអាមេរិក នៅក្នុងប្រទេសអាល្លឺម៉ង់។

អាល្លឺម៉ង់ គឺជាប្រទេសផ្តល់ជំនួយយោធាធំបំផុតទីពីរដល់អ៊ុយក្រែនបន្ទាប់ពីសហរដ្ឋអាមេរិក ប៉ុន្តែមានផែនការកាត់បន្ថយថវិកាពាក់កណ្តាលសម្រាប់ជំនួយនោះ នៅឆ្នាំក្រោយ។