កោះតៃវ៉ាន់ភាគខាងត្បូង នៅថ្ងៃសុក្រ (០៤ តុលា) នេះ កំពុងធ្វើប្រតិបត្តិការបោសសម្អាតការខូចខាត និងកម្ទេចកម្ទីដោយសារទឹកជំនន់ និងខ្យល់បក់ខ្លាំង បន្ទាប់ពីព្យុះទីហ្វុង ក្រាថ្សន (Krathon) បានវាយបោកលើទីក្រុងរណបដ៏ធំមួយ ខណៈផ្នែកផ្សេងទៀតនៃកោះបានបើកដំណើរការឡើងវិញ ហើយទីផ្សារហិរញ្ញវត្ថុក៏បានបើកឡើងវិញផងដែរ។

ព្យុះទីហ្វុង Krathon ដែលឥឡូវនេះធ្លាក់ចុះមកនៅត្រឹមព្យុះត្រូពិច បានបោកបក់ដល់ដីនៅទីក្រុងកំពង់ផែ កាវសុង (Kaohsiung) ភាគនិរតី បង្កការជន់លិចផ្លូវ និងអគារមួយចំនួន ហើយបានបង្កការខូចខាតជាច្រើន។

ខណៈពេលដែលផ្នែកភាគច្រើននៃកោះតៃវ៉ាន់ បានបន្តការងារឡើងវិញនៅថ្ងៃសុក្រ រដ្ឋាភិបាលតំបន់នៅក្រុង Kaohsiung និងតំបន់ ភីងទុង (Pingtung) ដែលនៅជិតខាង បានប្រកាសឈប់សម្រាកការងារមួយថ្ងៃទៀត ដែលជាលើកទីបួនជាប់ៗគ្នា ដើម្បីបោសសម្អាតដើមឈើដែលដួលរលំ បូមទឹកដែលជន់លិច និងសម្អាតសំរាមចេញពីផ្លូវ។

ថាមពលអគ្គិសនីនៅតែបន្តដាច់ក្នុងថ្ងៃសុក្រនេះសម្រាប់លំនៅឋានចំនួន ១០០.០០០គ្រួសារ ដែលស្ទើរតែទាំងអស់នៅក្នុងទីក្រុង Kaohsiung និង Pingtung។ នាយកដ្ឋានពន្លត់អគ្គិភ័យបាននិយាយថា ចំនួនអ្នកស្លាប់មិនផ្លាស់ប្តូរទេគឺនៅត្រឹម ២នាក់ ដោយអ្នកស្លាប់ដែលជាបុរសទាំងពីរនាក់នោះបានជួបគ្រោះថ្នាក់នៅឆ្នេរភាគខាងកើត មុនពេលព្យុះទីហ្វុងបានបោកបក់ដល់ដី ដោយមនុស្សម្នាក់បាត់ខ្លួន និងជិត ៧០០នាក់រងរបួស៕