ក្រុមបាតុកររាប់ពាន់នាក់ បានប្រមូលផ្ដុំគ្នាតវ៉ានៅទីក្រុងវីយែន កាលពីថ្ងៃព្រហស្បតិ៍ (០៣ តុលា) ដើម្បីជំរុញឱ្យគណបក្សនយោបាយរបស់ប្រទេសអូទ្រីស ជាពិសេសក្រុមអភិរក្សនិយមដែលកំពុងកាន់អំណាច កុំឱ្យចូលរួមរដ្ឋាភិបាលជាមួយគណបក្សសេរីភាព (FPO) ស្តាំនិយមជ្រុល បន្ទាប់ពីបក្សនេះបានឈ្នះការបោះឆ្នោតសកលជាលើកដំបូងកាលពីថ្ងៃអាទិត្យសប្ដាហ៍មុន។

បក្សស្តាំនិយមជ្រុល FPO ទទួលបានសំឡេងឆ្នោត ២៩% ក្នុងការឈ្នះជាប្រវត្តិសាស្ត្រសម្រាប់គណបក្សរិះគន់សហភាពអឺរ៉ុប និងងាកទៅខាងរុស្ស៊ីមួយនេះ ដែលបានបង្កើតឡើងក្នុងទសវត្សរ៍ឆ្នាំ១៩៥០ ក្រោមអ្នកដឹកនាំដែលធ្លាប់ជាសមាជិកសភារបស់ក្រុមណាហ្ស៊ី។ ទោះជាយ៉ាងនេះក្តី ដោយមិនទទួលបានសំឡេងភាគច្រើនដាច់ បក្ស FPO នឹងត្រូវបង្កើតក្រុមចម្រុះដើម្បីដឹកនាំរដ្ឋាភិបាលជាលើកដំបូង។

មានតែបក្សប្រជាជន (OVP) អភិរក្សនិយមប៉ុណ្ណោះ ដែលបើកចំហសម្រាប់សម្ព័ន្ធភាពក្រុមចម្រុះ ក្នុងលក្ខខណ្ឌថាមេដឹកនាំបក្ស FPO គឺលោក ហើប៊ឺត ឃីកខល (Herbert Kickl) មិនចូលជាផ្នែកមួយនៃរដ្ឋាភិបាល ប៉ុន្តែបក្សស្ដាំនិយមជ្រុលមួយនេះបដិសេធ។

អ្នករៀបចំការតវ៉ាម្នាក់បានប្រាប់ទូរទស្សន៍ Puls 24 ខណៈហ្វូងមនុស្សយ៉ាងច្រើនបានប្រមូលផ្តុំគ្នានៅមុខសាកលវិទ្យាល័យវីយែនថា “យើងចង់បញ្ជាក់ឱ្យច្បាស់ថាសូមឱ្យបក្សអភិរក្សនិយម OVP កុំចូលទៅក្នុងកិច្ចព្រមព្រៀងក្រុមចម្រុះជាមួយក្រុមស្ដាំនិយមជ្រុល”។ ក្រុមអ្នកតវ៉ាបានគ្រវីទង់ជាតិ និងបដាដែលមានពាក្យតវ៉ាដូចជា “ការពារលទ្ធិប្រជាធិបតេយ្យ”។

លោកប្រធានាធិបតី អាឡិចសានឌឺ វ៉ាន ដឺបេលែន (Alexander Van der Bellen) ដែលមើលការខុសត្រូវលើការបង្កើតរដ្ឋាភិបាល គ្រោងនឹងជួបជាមួយថ្នាក់ដឹកនាំនៃគណបក្សសភាទាំងអស់ ដោយចាប់ផ្តើមពីមេដឹកនាំបក្សស្ដាំនិយមជ្រុលគឺលោក Kickl នៅថ្ងៃសុក្រនេះ៕