ទឹកជំនន់ បានវាយប្រហារនៅឆ្នេរសមុទ្រភាគខាងត្បូងប្រទេសម៉ិកស៊ិក កាលពីថ្ងៃព្រហស្បតិ៍ ទី៣ ខែតុលា មុនពេលការបោកបក់មកដល់នៃព្យុះវិសម្ពាធត្រូពិក Eleven-E ។

ឆ្មាំជាតិ និងកងទ័ព ត្រូវបានដាក់ពង្រាយទៅកាន់ទីក្រុង Juchitan ជិតឆ្នេរសមុទ្រប៉ាស៊ីហ្វិក ជាកន្លែងដែលលំនៅឋានជាច្រើនខ្នង បានជន់លិច ហើយអ្នកស្រុក បានជម្លៀសខ្លួនទៅកាន់ទីជម្រកកសាធារណៈ។

អ្នកស្រុក បាននិយាយទៅកាន់សារព័ត៌មានប្រាប់រ៉យទ័រថា ពួកគេបានជម្លៀសខ្លួនចេញពីលំនៅឋាន នៅពេលព្រឹកព្រលឹម បន្ទាប់ពីទឹកទន្លេក្នុងស្រុក បានហក់ឡើងហៀរច្រាំង។

មជ្ឈមណ្ឌលព្យុះសង្ឃរាជាតិសហរដ្ឋអាមេរិក (NHC) បានព្រមានថា ភ្លៀងធ្លាក់ខ្លាំងបន្ថែមទៀតនឹងបង្កការខូចខាតនៅឆ្នេរសមុទ្រភាគខាងត្បូងប្រទេសម៉ិកស៊ិក ខណៈព្យុះវិសម្ពាធត្រូពិក Eleven-E កាន់តែខ្លាំងឡើង ដោយបង្កើនការព្រួយបារម្ភអំពីទឹកជំនន់ និងលំហូរដីល្បប់ដែលអាចកើតមាន នៅក្នុងតំបន់លិចទឹក បង្កដោយព្យុះ។

ព្យុះត្រូវបានគេព្យាករណ៍ថា នឹងវាយបក់ដល់ដីគោក នៅថ្ងៃសុក្រ ទី៤ ខែខែតុលានេះ នៅភាគខាងត្បូងប្រទេសម៉ិកស៊ិក ដោយមានការព្រមានអំពីព្យុះត្រូពិកធ្វើឲ្យប៉ះពាល់នៅទូទាំងផ្នែកជាច្រើន នៅឆ្នេរសមុទ្រ។

កាលពីសប្តាហ៍មុន ព្យុះសង្ឃរា John បាននាំមកនូវទឹកភ្លៀងខ្លាំងនៅតំបន់មួយចំនួន  បណ្តាលឱ្យមានបំណាក់ដី ហើយយ៉ាងហោចណាស់មនុស្ស២២ នាក់ បានស្លាប់។